Largohet Mujkiç, Tomori i jep letrat

Armir Mujkiç largohet nga Tomori. Boshnjaku ka shpallur "divorcin" e parakohshëm me ekipin ku luajti për 17 ndeshje dhe shënoi dy gola në këtë sezon dhe duket se ka gjetur mirëkuptim me klubin. Këta të fundit nuk e kanë ndaluar dhe i kanë dhënë lejen e kalimit. Nga sa mësohet prej gazetës, mbrojtësi 25-vjeçar ka marrë një ofertë të majme jashtë vendit dhe drejtuesit duket se nuk e kanë parë të udhës që t'i bëhen pengesë. SITUATA - Ndalesa e kampionatit nuk i ka shërbyer Tomorit, që do të vijojë të jetë pushim edhe këtë javë, për shkak të rregullores të fazës së tretë të Kategorisë së Parë. Për "Panorama Sport", sulmuesi Aldo Dervishi foli mbi situatën në fjalë: "Kjo ndalesë e kampionatit nuk është diçka e mirë, për shkak se ul ritmin e garës. Jo vetëm për ne, por për cilëndo skuadër. Tomorit i ndikon dyfish kjo gjë, pasi këtë javë jemi sërish pushim për shkak të strukturës së kampionatit. I dënojmë aktet e dhunës në fushën e lojës, pasi janë antisportive dhe nuk i shkojnë për shtat këtij sporti të bukur. Megjithatë, edhe gjyqtarët nuk janë pa gjë në këtë mes". Beratasi u ndal edhe tek objektivat e skuadrës, teksa u shpreh se duhet kujdes. "Në këtë pikë, asnjë ndeshje nuk duhet marrë lehtë. Të gjitha ekipet kanë nevojën për pikët dhe gjithsecila sheh llogaritë e veta. Ekipi ynë duhet të përqendrohet në çdo sfidë, duke filluar që nga ajo me Elbasanin. Verdheblutë janë një skuadër që nuk duhen nënvlerësuar, pasi e pamë shumë mirë sesi na surprizuan në 'Adush Muça'. Tashmë nuk duhet të gabojmë si në ndeshjen e parë dhe duhet ta mbyllim me 3 pikët në favorin tonë", përfundoi 26-vjeçari.