E bujshme, Reali rikthen Zidanin
Zizu pranon ta nisë atje ku e la në fillim të sezonit, firmos deri në vitin 2022
Një rikthim i bujshëm. Në vetëm fare pak orë erdhi edhe konfirmimi zyrtar për t'u dhënë fund dyshimeve. Zinedin Zidan rikthehet zyrtarisht në stolin e Realit të Madridit dhe bëhet trajneri i tretë i sezonit në "Santiago Bernabeu" pas Hulen Lopetegit, i shkarkuar më 29 tetor dhe Santiago Solarit, që pati të njëjtin fat ditën e djeshme. "Bordi drejtues, thuhej në komunikatën zyrtare të klubit, - vendosi që të prishë kontratën me Santiago Solarin, të cilit i ka kërkuar që të qëndrojë në klub. Reali çmon punën e kryer nga Solari dhe besnikërinë e tij ndaj klubit. Bordi drejtues emëron Zinedin Zidanin trajnerin e ri, kontratë që hyn në fuqi menjëherë këtë sezon dhe tri sezone të tjera. Kontrata do të skadojë në qershor 2022", për t'i lënë më pas radhën prezantimit të trajnerit mbrëmë në orën 20:00.
EKSKLUZIVE
Lajmin e papritur e dha drejtori i programit televiziv "Chiringuito di Jugones", Josep Pedrerol, gazetar shumë pranë presidentit Florentino Perez. Lajmi mori dhenë gjatë mëngjesit të së hënës në kanalin "La Sexta" dhe nga atje u përhap me shpejtësi në të gjithë shtypin spanjoll dhe botëror, që konfirmonin njëri pas tjetrit përmes një serie telefonatash dhe merrnin të gjithë të njëjtën përgjigje: lajmi është shumë i vërtetë. Dhe gjatë pasdites erdhi edhe zyrtarizimi i rokadës së papritur.
KËRKIM I DËSHPËRUAR
Mbrëmjen e së dielës, pas fitores së vuajtur në Vajadolidit, Emilio Butragenjo, shkoi për të dhënë një intervistë në televizion dhe nuk e konfirmoi vazhdimësinë e Solarit, duke e mbrojtur vetëm me një "profesionist i shkëlqyer", por pa e konfirmuar. Dihej që Solari i kishte ditët e numëruara dhe do të qëndronte në timonin e skuadrës derisa Perez të gjente një zëvendësues të denjë për këtë detyrë, diçka më pak e lehtë sesa ishte parashikuar. Asnjë kandidat në valle dhe në tavolinë ishin vetëm emrat e Zinedin Zidanit dhe Zhoze Murinjos. I pari dukej se kishte thënë "jo" sipas shumë burimeve të shtypit spanjoll, duke nisur nga "El Pais" në numrin e saj të djeshëm që këmbëngulte për këtë gjë, ndërsa për të dytin, shtoheshin gjithnjë e më shumë dyshimet për shkak të karakterit, ambientit që nuk është se e ka fort për zemër, tifozëve kundër, dështimeve të fundit dhe raportin e keq me lojtarë të veçantë në dhomën e zhveshjes, duke nisur nga kapiteni Serxho Ramos. Ishte e pashmangshme
rikthimi me këmbëngulje te emri i francezit.
LAMTUMIRË E PAPRITUR
Florentino u lodh pak, por në fund arriti që ta bindë. Francezi hoqi dorë nga "Casa Blanca" në mënyrë surprizë më 31 majin e shkuar, vetëm pesë ditë pasi kishte ngritur Champions-in e tretë radhazi. Tha se Reali kishte nevojë për një ndryshim të madh dhe nuk e shikonte veten të aftë për të vazhduar që të fitonte. Dhe po në mënyrë të papritur edhe rikthehet. Me sa duket, 284 ditët e pushimit ia kanë ndryshuar mendjen.