Levandovski alarmon Bajernin
Lodhje muskulore, bomberi në dyshim për sfidën më të rëndësishme të sezonit
Sulmuesi kryesor dhe i vetëm i Bajernit të Mynihut, Robert Levandovski, nuk është stërvitur me skuadrën ditën e djeshme. Polaku është parë i vetëm në palestrën e klubit duke bërë ushtrime force, teksa i gjithë ekipi ka qenë në fushë. Edhe pse drejtuesit e skuadrës më të titulluar në Gjermani nuk kanë dhënë asnjë vendim, Leva mësohet të ketë një lodhje muskulore dhe ka preferuar të mos marrë ngarkesë. Numri 9 shënoi dy gola në sfidën ndaj Volfsburgut duke siguruar tri pikët në fitoren 6-0 ndaj "ujqërve". Në fakt do të ishte një mungesë e rëndësishme ajo e sulmuesit në prag të supersfidës ndaj Liverpulit në Champions. Ndeshja e parë ka përfunduar me rezultatin 0-0 dhe Bajerni kërkon të mbyllë nesër llogaritë e kualifikimit me të kuqtë. Leva pritet në stërvitjen e sotme me skuadrën, duke mbyllur çdo dyshim për prezencën e tij. Tifozët e shumtë bavarezë që do të jenë të pranishëm në "Allianz Arena" kanë ezauruar të gjithë biletat në dispozicion. Atmosfera pritet të jetë e nxehtë në Mynih. Pas fitores së thellë me Volfsburgun në fundjavë, optimizmi është rritur ndjeshëm në ekip. Bavarezët kanë marrë kryesimin e
kampionatit së bashku me Borusian që ka një golavarazh më të dobët në krahasim me kampionët. Gjithsesi, në Mynih janë të bindur që ndeshja më e rëndësishme e sezonit luhet nesër. Liverpuli është cilësuar një provë force jo vetëm për lojtarët, por edhe për trajnerin
Niko Kovaç, i cili do të kërkojë ashtu si në ndeshjen e parë, të surprizojë skuadrën e trajnerit gjerman, Jurgen Klop, i cili i druhet jo pak skuadrës së Mynihut. Kujtojmë se Klop është mundur më parë nga Bajerni në finalen e Champions-it në sezonin 20122013 në "Uemblei".