Alarm, Interi ka vetëm 11 lojtarë
Zgjidhje mund të jetë skema 3-4-3 si me Spalin, Shkrinjar ndoshta mesfushor
Duket si një grup në "Whatsapp" për orga nizimin e një ndeshjeje mes miqsh. Sa jemi për të enjten? Unë jo, nuk jam ftuar (në këtë rast, jashtë liste). Unë nuk mundem, ndihem keq (i dëmtuar). Dhe kështu do mbeten vetëm njëmbëdhjetë, përveç portierëve. Nga të cilët një pjesë janë në kushte fizike jo perfekte. Një situatë që nuk lejon hapësira të gjera manovre, por ndoshta do konsiderohet si një stimul më shumë për të kaluar në çerekfinale, duke mposhtur Ajntrahtin e Frankfurtit dhe fatin e keq. Janë kushtet e punës së Luçiano Spaletit në prag të kthimit të 1/8-ave në Ligën e Europës, e programuar në "San Siro" të enjten në 21:00. Me vetëm një rezervë nga skuadra e parë dhe lista B, përfshi talentet e U-19, që do zbrazet për të mbushur së paku stolin.
SITUATA - Nga sfida e së dielës e fituar 2-0 kundër Spalit pozitiv ishte vetëm rezultati, që lejon frymëmarrje për sa i përket klasifikimit pasi u mbajt hapi me Milanin përpara derbit. Notat negative ishin dëmtimet e Brozoviçit dhe Mirandës, të padisponueshëm për të enjten. Braziliani ka pësuar një frakturë të hundës pas dyluftimit në minutën e 6-të me Petanjën. Qëndroi në fushë deri në fund të pjesës së parë, më pas u dorëzua dhe u shoqërua në klinikë: do operohet, për përballjen me gjermanët e pamundur të rikthehet, ka shanse për ta parë në derbi, ndoshta me ndihmën e maskës mbrojtëse. Akoma më i ndërlikuar diskutimi për Brozoviçin: kroati u bllokua për shkak të një problemi muskulor dhe do u nënshtrohet disa testeve këto ditë për të kuptuar gjendjen. Përshtypjet e para janë negative, kontrollet do kryhen me shumë mundësi sot: përjashtohet mundësia për ta parë në Europë, por edhe në rast përgjigjeje pozitive, të pakta janë shanset për ta parë të dielën.
ZGJIDHJE - Problemeve u shtohen Naingolani, Lautaro dhe Azamoah: belgu dje punoi për herë të parë me grupin pas dëmtimit të një jave më parë në stërvitje, ndërsa argjentinasi dhe ganezi janë të padisponueshëm për numër kartonësh. Spaleti, pas Spalit, u shpreh: "Do gjejmë zgjidhjet, mund të provojmë mbrojtjen me tre: dikush mund të dalë edhe jashtë roli". Mendja shkon menjëherë te Shkrinjar, i cili me Sllovakinë ka bërë në më shumë se një rast mesfushorin, repart ku të gatshëm janë vetëm Borha Valero dhe Vesino. Alternativa është konfirmimi i modulit të pjesës së dytë të së dielës: 3-4-3. Hallet më të mëdha janë në sulm: Keita do "sakrifikohet" duke luajtur me dhimbje, i mbështetur nga Politano, Perisiç dhe Kandreva. Do nevojitej Ikardi, në momentin më të vështirë të skuadrës.