Halili: Borxhet një tmerr, nuk licencohemi për Europën
"Financojmë gjithë sezonin, por rrezikojmë licencimin"
Futbolli shqiptar ka probleme të mpreh ta që kanë të bëjnë me financat. Specifikisht, ishte presidenti i Tiranës, Refik Halili, që i adresoi në tryezën e djeshme ku ishin përfaqësues të kabinetit qeveritar dhe anëtarë të FSHF-së. Në fjalën e tij, Halili ngre shqetësimet që kanë të bëjnë me borxhet e klubeve, marrëveshjet kontraktuale që nënshkruajnë klubet me futbollistët dhe disnivelet që pranon institucioni i futbollit dhe mbi të gjitha me licencimet. SITUATA
Halili shpreh besimin se gjithçka është ngritur si shqetësim nga klubet me një vullnet të mirë mund të marrë zgjidhje për ta përmirësuar futbollin. "Unë shpresoj se më keq sesa kemi qenë nuk do të bëhemi. Jam i bindur dhe shpresoj se të gjitha premtimet që u thanë, të zgjidhen. Gjithashtu, jam i bindur që me anë të komisioneve dhe me ato që ne do të themi, gjithçka do të gjejë zgjidhje", ishte hyrja e diskutimit nga Zoti Halili. BORXHET
Tirana është një nga klubet, e cila nën administrimin e bashkisë në vitet e shkuara ka krijuar një borxh të madh financiar, për të cilën Halili e paraqiti situatën e klubit duke zbuluar faturat që u janë shtuar arkave të klubit si detyrime. "Do të thosha diçka zoti kryeministër, nga eksperienca që kam unë në futboll. Në fakt, edhe ju keni qenë drejtues i klubit të Tiranës. Në momentin që klubi shkoi drejt privatizimit në bazë të kërkesave të UEFA-s në vitin 2011, ne donatorët dhe unë kur isha në fund, e kemi dorëzuar klubin me 48 mijë euro borxhe. Gjatë periudhës, në të cilën u privatizua dhe për fat të keq pati një menaxhim shumë të keq, klubi shkoi deri në 2.4 miliardë lekë borxhe deri në fund të vitit 2014. Do të thosha që shikoj se në momentin e privatizimit, dua t'ua them këtë në lidhje me privatizimet që mund të vijnë në të ardhmen, në këtë periudhë pashë që shumë vetë iu drejtuan klubit duke nisur shumë gjyqe. Vinin shkresa pa fund, vazhdojnë akoma, por besoj se nuk do të ketë më. Dhe bëhet fjalë për gjyqe që duhet t'i kishin bërë në periudhën e bashkisë, 2011-2014", shtoi ish-donatori dhe aktualisht presidenti i Tiranës.
APELI
Sipas Halilit, bashkitë duhet të tregojnë kujdes sa u përket kontratave që nënshkruajnë në periudhat kur administrojnë klubet. "Në momentin kur drejtohet në këtë mënyrë, bëhet fjalë për një pronë të të gjithëve dhe të askujt. Edhe bashkitë që nuk i kanë privatizuar akoma klubet, duhet të jenë shumë të kujdesshëm për sa u përket marrëveshjeve dhe kontratave që hartojnë me futbollistët", vijoi numri një i klubit të Tiranës. KONTRATAT
Një tjetër shqetësim thelbësor i futbollit shqiptar në këtë periudhë është çështja e kontratave që depozitohen në federatë. Sipas zotit Halili, ka disa lloje standardesh: "Për mua ka diçka tjetër, që gara nuk fillon e pastër. Pse? Sepse ka klube dhe presidentë klubesh, mes të cilëve po fus edhe unë veten time bashkë me shokët, që e bëjnë 220 mijë lekë kontratën dhe dikush tjetër që e bën 2 apo 3 milionë (lekë të vjetër). Ndaj, kjo nuk është garë e pastër. Unë shpresoj se më të gjitha çfarë u tha, me ndryshimet që në masën 100%, futbolli do të marrë rrugën e duhur", u shpreh Halili. LICENCIMET
Në vijim të fjalës së tij, presidenti i bardhebluve ngriti shqetësimin duke bërë një kërkesë që të gjendet një zgjidhje për detyrimet e prapambetura në lidhje me Tatimet. "Kam një kërkesë. Nga eksperienca që kam në lidhje me privatizimin e ndërmarrjeve shtetërore dhe klubet sot janë ndërmarrje shtetërore, do të thosha se ato gjyqe që janë bërë para vitin 2010, siç kam dy të tilla të famshme në klubin e Tiranës, janë gjyqe të tmerrshme, me falsifikime të papara dhe ato sot na penalizojnë që ne nuk marrim dot licencimin. Fakt është se financojmë gjatë gjithë vitit dhe nuk marrim dot licencimin. Kemi edhe një gjë tjetër dhe për këtë kërkojmë ndihmë kundrejt detyrimit. Pavarësisht se çfarë do të bëhet në të ardhmen. Kemi detyrime të tmerrshme në Tatime, të mbetura nga ajo kohë që kanë qenë shumë të mëdha. Në bashkëpunim me bashkinë, e cila është edhe aksionarja kryesore me 34% të aksioneve, kemi arritur që të likuidojmë shumë borxhe. Borxhet në fakt arrijnë në 1.6 miliardë. Është tmerr, shifër shumë, shumë e madhe. kërkojmë që të paktën për marrjen e licencimit, pavarësisht si mund të jetë ligji, Tatimet të na bëjnë një marrëveshje që ne të likuidojmë me këste", deklaroi Refik Halili, presidenti i klubit 24 herë kampion në Shqipëri, i cili në fund e mbylli duke shprehur shpresën se futbolli mund të përmirësohet. "E fundit është se unë shpresoj që të ndryshojnë gjërat dhe do të bëhet shumë mirë për futbollin. E kam bindje këtë", përfundoi Halili.