Ramos: Është e tmerrshme, por unë nuk fshihem
E vështirë që ta përkufizosh si frontin e ri të gazetarisë. Por sigurisht që bëhet fjalë për një intervistë pa filtra, nga momenti që intervistuesi dhe i intervistuari janë... i njëjti person. Goditje gjeniu apo përpjekje për të treguar gjëra të rëndësishme, pa komoditetin e dikujt që formulon pyetjet? Nuk i dimë me saktësi se cilat kanë qenë arsyet që e shtynë Serxho Ramosin që të lëshojë një autointervistë për një futbollist të këtij niveli, gjë që nuk ishte parë ende. E ka bërë në spanjisht dhe anglisht dhe e ka publikuar në rrjetet sociale, atje ku çdokush mund ta shfletojë falas dhe lehtësisht, ta komentojë kujt i pëlqen shumë dhe të arrijë një lexueshmëri rekord. Sepse mbrojtësi i Realit të Madridit ka gati 16 milionë ndjekës në "Twitter" dhe mbi 30 milionë në "Instagram", dy platformat e zgjedhura për t'i dhënë jetë një komunikimi kurioz pyetjepërgjigje. "Si futbollistë neve na pëlqen të flasim në fushë, por ky sezon nuk po rezulton i tillë. Ngjarjet e fundit kanë qenë të tmerrshme dhe unë nuk po fshihem. Ne nuk po fshihemi. Ne lojtarët, jemi përgjegjësit e parë dhe unë si kapiten më shumë se kushdo", nis Ramos. A ishte kartoni i verdhë në Amsterdam një gabim? Absolutisht, ishte një gabim dhe unë marr përgjegjësinë 200%. Përse e regjistruat dokumentarin? Ka disa angazhime të caktuara që duhen përmbushur dhe mua nuk më kaloi për asnjë çast në kokë se ndeshja do të shkonte ashtu siç shkoi. U zutë me presidentin në dhomën e zhveshjes? Ajo që ndodh në dhomën e zhveshjes diskutohet dhe zgjidhet atje. Nuk ka asnjë problem të tillë dhe të gjithë kanë të njëjtin interes. A ju drejtuat shokëve të skuadrës dhe ai i kritikuat ata? Ne flasim gjithnjë dhe motivojmë njëri-tjetrin në dhomën e zhveshjes dhe gjithnjë në mënyrë konstruktive. A u përplasët me Marselon? Ne kemi përplasje në çdo seancë stërvitore. Është pjesë e punës me presion. Por është vetëm një anekdotë, si shumë të tjera që ndodhin nga dita në ditë. Marselo është si një vëlla për mua. Përse udhëtuat në Vajadolid? Sepse doja të isha pranë dhe të mbështesja shokët e skuadrës. Çfarë po ndodh me trajnerin? Është një vendim që nuk na takon neve ta marrim dhe që nuk do ndërhyjmë kurrë. Ne kemi shumë respekt për atë pozicion dhe do ta mbështesim gjithnjë trajnerin e Realit. Së bashku duhet të punojmë për të ardhmen dhe rikthejmë shpresën.