JA ÇFARË KËRKON FSHF
FSHF, për të adresuar disa nga problematikat e hasura në zhvillimin e futbollit, ka evidentuar për të ndërhyrë në ligjet e mëposhtme: LIGJI PËR SPORTIN - Procedurat e përjashtimit dhe listat e materialeve e pajisjeve sportive që përjashtohen nga detyrimet doganore dhe TVSH nuk janë përcaktuar ende me një VKM të re siç e kërkon ligji. Të ardhurat e përfituara nga e drejta e transmetimit audioviziv t'u kalojë organizatorëve në masën 100%, duke u ndryshuar kështu formulimi i Nenit 36/2 të Ligjit. Për sa i përket krijimit të Fondit Kombëtar të Zhvillimit të Sportit (Neni 40) nga të ardhurat që sigurohen nga lotaritë sportive, mbetemi në pritje të përcaktimit të kritereve për shpërndarjen dhe përdorimin e fondit, sidomos tani që janë ndaluar lojërat e fatit. Është pranuar edhe nga vetë policia se kompanitë SHPSF nuk janë të specializuara për ofrimin e shërbimeve në aktivitete të tilla, ndaj është e domosdoshme prania e policisë në stadiume. Propozojmë që në Kodin Penal të futen parashikime për dënime penale për ata që cenojnë mbarëvajtjen e aktiviteteve sportive. SPONSORIZIMET - Përqindja nga ligji si shpenzim i zbritshëm propozohet që të rritet në një masë më të madhe, në mënyrë që tregu i sponsorizimeve të pasurohet me subjekte që përveç se kanë dëshirë të reklamojnë bizneset, kanë edhe stimulime fiskale. TATIMI MBI TË ARDHURAT - Ligji aktual për sportin ka njohur statusin e sportistit të nivelit të lartë. Asnjë VKM nuk ka dalë ende për të përcaktuar përfitimet që këta sportistë duhet të gëzojnë. FSHF është e mendimit se kjo kategori sportistësh jo vetëm që duhet zgjedhur duke përcaktuar kritere strikte, por duhet t'u krijohen lehtësira tatimore siç mund të jetë përjashtimi nga tatimi mbi të ardhurat personale. LIGJI PËR TVSH-NË - Reduktimi i tatimit mbi vlerën e shtuar është një nga lehtësirat që mund t'u krijohen personave që investojnë në sport. Ky instrument mund të përdoret specifikisht për infrastrukturën sportive. Ligji aktual për sportin, thjesht i citon objektet sportive pa u krijuar atyre që investojnë në këto objekte asnjë privilegj. Në këtë drejtim, do të propozonim që investimet e lidhura ngushtë me zhvillimin e infrastrukturës sportive në Republikën e Shqipërisë të kenë TVSH zero. Kjo si një mënyrë për të afruar investitorë të huaj e vendës. Për shembull, në Itali, subjektet anëtare të Seria B dhe Lega Pro, të cilët investojnë resurse për modernizimin e impianteve të tyre sportive, gëzojnë një reduktim të TVSH-së në masën 12% të investimit.