"Policia? Një diskutim me 2 vite vonesë"
Ministri i Brendshëm, Sandër Lleshaj, i pranishëm dje në tryezën e përbashkët për problemet e futbollit, në fjalën e tij theksoi se policia ka një kosto të lartë për të qenë brenda stadiumeve. "Policia e Shtetit është e detyruar më ligj të ofrojë dhe garantojë siguri për qytetarët e Republikës kudo ku ata janë, edhe kur ndodhen në skutat e apartamenteve të tyre dhe devijojnë nga normaliteti, edhe kur janë në stadium, edhe kur janë në rrugë, edhe kur janë në protestë, pra ka një gamë shumë të gjerë përgjegjësish për të kryer. Por këtu vlen ta theksojmë që policia është një strukturë e dhënë; që ka disa parametra të dhënë, ka një madhësi të dhënë, ka kapacitete të caktuara. Dhe kemi dy gjëra që duhet t'i mbajmë në konsideratë: kapacitetet edhe kompetencat! Dhe kur diskutojmë për futbollin, këto të dyja bëhen faktorë për t'u konsideruar, madje edhe shqetësues, për arsye se, e para, kemi kompetencat që na mungojnë për t'u futur brenda stadiumeve. Sot bëjmë një diskutim të paktën dy vjet me vonesë se kur është hartuar ligji për sportin, këto gjëra nuk janë marrë në konsideratë dhe duheshin marrë në atë kohë. Por gjithsesi ne tani jemi për t'u marrë me faktin. Policia ka kapacitete të caktuara, të cilat janë parashikuar për të ofruar siguri publike, por jo për të shkuar mbas çdo rasti individual sepse është e vështirë. Kemi shumë pak policë, por shumë probleme dhe shumë barrë, të cilat i ngarkohen policisë edhe kur asaj nuk i takojnë në mënyrë origjinale. Kështu them që gjatë diskutimeve që do të vijojnë, policia është e gatshme për ta vijuar këtë diskutim në nivel ekspertësh dhe në një klimë mirëkuptimi dhe jo kështu topi në publik për ta hedhur dhe pritur secili në mënyrën e tij. Jemi të gatshëm që ta fillojmë këtë proces, do ta fillojmë, do të ngarkojmë personat kompetentë për të marrë përsipër përgjegjësitë nga ana e policisë, por do të na duhet gjithsesi t'i mendojmë të dyja këto. Sa herë të kërkojmë diçka nga policia, do të jemi të qartë që kjo do të ketë edhe një faturë, e cila nga dikush duhet paguar për arsye se na duhet të rrisim kapacitetet. Me kapacitetet aktuale policia ka vështirësi, edhe sikur t'i ketë kompetencat ligjore, ka vështirësi ta përballojë volumin shumë të lartë të aktiviteteve sportive që kryhen në të gjithë vendin. Sipas një përllogaritjeje të vogël, ne na duhet që për çdo ditë sportive të kemi rreth 500 deri në 700 policë të angazhuar vetëm me këtë çështje, e cila do të thotë: orë shtesë, kapacitete shtesë e të tjera me radhë. Unë besoj që përveç kësaj do të kemi edhe një hapësirë tjetër ku mund të ndërhyjmë dhe kjo ka të bëjë me atë që të rregullojmë ato gjëra, të cilat nuk kërkojnë as kapacitetet, as investime, por kërkojnë organizim", deklaroi ministri Lleshaj.