Siti 7 goditje Shalkes dhe tmerron kundërshtarët

Anglezët arrijnë fitoren më të thellë europiane

Duhet të ishte një formalitet, dhe jo vetëm ishte i tillë, por ishte edhe më i thjeshtë seç pritej. Mançester Siti i Pep Guardiolës fiton edhe ndeshjen e kthimit kundër Shalkes dhe kualifikohet në çerekfinalet e Champions-it. Përfundon me një "tërmet" 7 ballësh falë dopietës së Agueros dhe golave të Sanesë, Sterlingut, Bernardos, Fodenit dhe Zhezusit. Pas fitores 3-2 në Gjermani, "qytetarët" e kishin hedhur një këmbë në 8 skuadrat më të mira. Tani, kampionët e Anglisë që në historinë e tyre rezultatin më të mirë kanë gjysmëfinalet e 2016ës, duhet të masin forcat me ekipe më të forta se minatorët nga Gelzenkirsheni. Nëse kishte një shpresë për Shalken, ishte që Siti t'i qasej keq ndeshjes. Por anglezët i dominuan rivalët në zotërimin e topit, duke i detyruar të vrapojnë bosh për periudha të gjata. Rastin e parë e krijuan me Bernardon, i cili nis Sterlingun në thellësi, sulmuesi kalon Oczipkan dhe shërben Agueron, i cili i fiton kohën Brumës dhe godet shtyllën. Në 35' Mançesteri zhbllokohet: Gyndoan sheh futjen e Bernardos, i cili pengohet në zonë nga Bruma. Penallti dhe Aguero e transformon. Tre minuta më vonë vjen goli i dytë, gjithnjë me argjentinasin autor (i 11ti në 7 ndeshjet e fundit kundër ekipeve gjermane): pas topit të Gyndoan, Sterling mbron mirë topin nga Oczipka dhe shërben me thembër për Kun, që diagonalen e dërgon mes këmbëve të portierit. Në 42' vjen grushti i tretë: asist i Zinçenkos, Sane çmarkohet nga MekKeni dhe ndëshkon sërish ish-ekipin e tij. Edhe pse me kualifikimin në xhep, Siti vazhdon të sulmojë edhe në pjesën e dytë: në 51' Sane shpërdoron një rast të mirë dhe dy minuta më vonë shënon, por goli anulohet për pozicion jashtë loje. Por pa u mbushur një orë lojë maturohet "pokeri": Sane në të majtë, shikon Sterlingun në shtyllën e dytë dhe e shërben me një krosim të bukur, të cilin sulmuesi e transformon fluturimthi. Në 71', "Etihad" feston sërish: Bernardo, i shërbyer nga Sane, mposht sërish Fehrmanin. 6-0 vjen në 78', sërish nga një shpikje e Sanesë (3 asiste) që peshkon Fodenin, i cili driblon edhe portierin dhe e depoziton topin në rrjetë. Në 84' dhe goli i shtatë, me një goditje nga jashtë zone të Gabriel Zhezus. Ky është goli që ul siparin e një ndeshjeje, që ndoshta është e fundit për Tedeskon në stolin e bluve mbretërorë. Kjo ishte disfata më e rëndë e një ekipi gjerman në historinë e Champions-it, ndërsa "qytetarët" regjistruan fitoren e tyre më të thellë europiane. Siti ka shënuar 46 gola në 10 ndeshjet në shtëpi gjatë vitit 2019, mesatarisht 4.6 gola për ndeshje këtë vit kalendarik. Kush do dojë të vijë në Mançester në çerekfinale?!