Absurdi, 0-0 i kualifikon të dyja

Liverpuli barazoi 0-0 në ndeshjen e vajtjes në "Anfield Road" përballë Bajernit dhe tani anglezët nuk janë favoritët për t'u kualifikuar në çerekfinale, edhe pse luajnë për dy nga tri rezultate në "Allianz Arena". Statistikat për një skuadër që barazon pa gola në shtëpi në ndeshjen e vajtjes së Ligës së Kampionëve nuk flasin kurrsesi në favor të klubit anglez. Dihet që nëse nuk arrin të fitosh ndeshjen e parë në shtëpi, atëherë një barazim pa gola është alternativa më e mirë për t'iu drejtuar ndeshjes së kthimit, duke qenë se është në fuqi goli në fushë kundërshtare. Dhe nëse Liverpuli do të arrijë një barazim me gola në Mynih sonte, atëherë do të jenë anglezët që do të vazhdojnë më tej. Por që kur Kupa e Kampionëve ndryshoi format dhe u quajt Champions në vitin 1992, ka pasur 31 barazime 0-0 në ndeshjet e vajtjes dhe skuadra që e ka luajtur në shtëpi takimin e parë ka avancuar më tej në vetëm 9 raste, ndërsa miqtë 22 herë. Dhe ky bilanc është thelluar akoma më shumë që prej sezonit 2003/ 04, kur u prezantua faza e 1/ 8-ave, e cila zëvendësonte fazën e dytë të grupeve. Prej kësaj periudhe, ka pasur 22 ndeshje pa gola dhe 17 skuadrat që e luajtën ndeshjen e parë në transfertë ia dolën të kualifikoheshin. Për më tepër, vetëm 14 nga 70 skuadrat që kanë dështuar të shënojnë në shtëpi në 90 minutat e para, kanë arritur të kualifikohen, një statistikë që prej sezonit 200304 shkon në 7 skuadra nga 51. Bajerni duhet të jetë i qetë edhe për një tjetër fakt që flet gjithnjë në favor të tyre: sepse 58 nga 81 klubet që kanë barazuar jashtë fushe (44 nga 60 prej sezonit 2003-04) ia kanë dalë të presin biletën për në raundin tjetër. Liverpuli vjen në Mynih me shpresën për të provuar të kundërtën e historisë. Dhe detyra e tyre nuk është aspak e pamundur. Por e shkuara tregon se, pas 90 minutave të para në "Anfield Road", ne nuk mund të flasim më për një duel me shanse të barabarta, 50-50. Statistikat e përgjithshme nuk flasin për Liverpulin pas barazimit pa gola në ndeshjen e parë në shtëpi, por jo kur bëhet fjalë për historinë e tyre vetjake. Sepse në të dyja rastet kur "reds"-at kanë barazuar ndeshjen e parë 0-0 në shtëpi në Kupën e Kampionëve, ata janë kualifikuar. Në prill 1981, ata barazuan 0-0 me Bajernin në gjysmëfinalen e vajtjes, por në Mynih përfundoi 1-1. Ndërsa në 1983, pas barazimit me Bilbaon në ndeshjen e raundit të dytë, ata fituan në Spanjë 1-0.