Piontek paralajmëron Interin
8 gola në 9 ndeshje me Milanin, polaku kërkon të bëjë histori në sfidën e qytetit
Mungojnë pak ditë nga derbi kundër Interit, që do të luhet të dielën në mbrëmje dhe kurioziteti është shumë i madh për të gjithë. Në veçanti, projektorët do të drejtohen te Kristof Piontek. Polaku do të ketë sërish çelësat e sulmit të Milanit dhe pas 8 golash në 9 ndeshje me "djajtë" ka një tjetër provim për të kaluar. Ai është njeriu i duhur për të udhëhequr kuqezinjtë drejt një fitoreje, e cila do ta konfirmojë skuadrën në vendin e tretë të Serisë A dhe do të hidhte një hap të sigurt drejt rikthimit në Ligën e Kampionëve. Deri tani sulmuesi polak nuk ka zhgënjyer. Ka qenë gjithmonë në vendin dhe kohën e duhur për të dërguar topin në rrjetë.
XHENOA - SAMP
Për polakun, ky do të jetë derbi i parë i Milanos, por në karrierën e tij ka luajtur disa derbi të ndryshëm dhe kjo do të thotë se i njeh mjaft mirë këto ndeshje. Kris e di se çfarë do të thotë të luash kundër një skuadre të të njëjtit qytet. Në Serinë A, për shembull, ai ka luajtur derbin mes Xhenovas kur mbante veshur fanellën e Xhenoas. Ishte 25 nëntori i vitit 2018 dhe pas golit të avantazhit të Kualjarelës për Sampdorias, Piontek fitoi dhe shndërroi në gol një penallti me shumë gjakftohtësi duke thyer portierin Audero. Sfida në "Marasi" përfundoi me rezultatin 1-1.
DERBI I KRAKOVËS
Në karrierën e tij, Kristof ka luajtur edhe derbin e nxehtë të Krakovës mes dy skuadrave (Krakova dhe Visla). Kjo është një ndeshje që përjetohet maksimalisht në Poloni dhe ka tension e luftë sportive. Pavarësisht gjithçka ndodhte në fushë dhe jashtë saj, Piontek ka bërë atë që di të bëjë gjithmonë: golat. Dy gola në tri ndeshje në derbin polak, çka do të thotë se di t'i kalojë mirë situatat e vështira dhe të mos ndiejë aspak presion në sfida të tilla. Të dielën do të luajë një derbi shumë më të rëndësishëm sesa dy të parët dhe do të kërkojë patjetër që ta shënojë emrin e tij në listën e golashënuesve të derbit të Milanos. Një sfidë që nuk vlen vetëm për historinë, por mbi të gjitha për aktualitetin. Milani dhe Interi janë në garë me njëra-tjetrën për një vend që të dërgon në Ligën e Kampionëve dhe ky derbi është si një finale më vete. Shkrinjar dhe De Vraj duhet të bëjnë kujdes sepse përballë kanë një "gjahtar" goli, i cili mund t'i ndëshkojë nga momenti në moment, me një gjysmë hapësire.