Interi, pakt kundër Ikardit për ta lënë jashtë derbit
Fitore me Frankfurtin e Milanin për t'i dhënë leksion
Nesër Ajntrahti i Frankfurtit, të di elën Milani. Dy sfida, në kuptimin e plotë të fjalës: me skuadrën e "gjymtuar" deri në kockë, Interi do përpiqet të dalë me sukses për t'i treguar Mauro Ikardit se nuk ka më nevojë për të. Nuk është mendimi i klubit, që deri tani është përpjekur të rikthejë ishkapitenin edhe për të mos e zhvlerësuar në merkato, por i grupit zikaltër. Sepse sidoqoftë, kërkesa e parë e krerëve interistë ka qenë e qartë: përtej punës diplomatike mes administratorit të deleguar Xhuzepe Marota dhe avokatit të zgjedhur nga pala Ikardi, Paolo Nikoleti, argjentinasi duhet të ballafaqohet fillimisht me skuadrën.
Piten fjalët e Mauros - Sipas mediave italiane, nëse Ikardi (i cili vazhdon stërvitjen e personalizuar me terapi për gjurin e djathtë dhe vrapime të lehta në palestër dhe me siguri do qëndrojë jashtë me Frankfurtin dhe për derbin) do vazhdojë të mos e konsiderojë të rëndësishëm një qartësim me shokët e ekipit, vështirë se do arrihet paqja totale. Lojtarët e Interit, po ashtu si drejtuesit dhe trajneri Luçiano Spaleti, presin fjalët e Mauros: ndoshta jo dalje publike apo zyrtare, por së paku një shpjegim rreth ngjarjeve dhe një qëndrim pozitiv për t'u ribashkuar me grupin. Sulmuesi, në krahun e tij, e sheh jo të nevojshëm këtë "kalim". Dhe ndërkohë nuk po kuptohen arsyet e vërteta se përse numri 9 nuk po largon kokëfortësinë për t'u rivendosur në gatishmëri të Interit. Derisa të mos ndryshojë qëndrim, çështja nuk do zhbllokohet. Për momentin, presidenti Stiven Zhang ende nuk ka pasur një takim me lojtarin: pak kohë më parë deklaroi se "Ikardi nuk largohet, për më shumë te Juventusi: do i ofrojmë rinovimin". E megjithatë, duke konsideruar situatën, largimi duket gjithmonë e më i afërt.