Daliu ngre alarmin: Të huajt po “vrasin” basketbollin
Bruno Daliu këtë sezon kaloi nga skuadra e Partizanit për t’u rikthyer te Tirana, skuadër nga e cila ka dalë si basketbollist. Në një intervistë për “Panorama Sport”, Daliu rrëfen eksperiencën e tij në radhët e kampionëve të Shqipërisë si dhe arsyet se pse u largua nga Partizani. Lojtari bardheblu komenton gjithashtu edhe “pushtimin” që lojtarët e huaj i kanë bërë kampionatit shqiptar të basketbollit. Si ka qenë ky sezon për ju në aspektin personal? Këtë sezon e nisa me skuadrën e Partizanit, që është një ekip ku unë kam shumë shokë dhe miq. Pata një mosmarrëveshje me trajnerin dhe rrugët tona u ndanë, ku trajneri bashkë me bordin drejtues vendosën që unë nuk u duhesha më në skuadër. Kështu ngela pa ekip dhe u riktheva te Tirana, në skuadrën ku unë kam hedhur hapat e parë në basketboll me trajner Arben Alimehmetin. Ishte skuadra e Tiranës që u interesua për mua, ku pas një bisede me trajnerin Erkand Karaj unë kalova në këtë ekip. Skuadra ishte në emergjencë, pa kondicion dhe Karaj sapo ishte emëruar trajner. Megjithatë, gradualisht javë pas jave e morëm veten të gjithë së bashku ku u krijua edhe fryma e grupit. Skuadra jonë është ekipi i vetëm pa rroga në kampionatin shqiptar, ku të gjitha skuadrat e tjera kanë rroga të larta dhe kanë afruar lojtarë të huaj e megjithatë, po bëjmë një paraqitje shumë të mirë. Cilat janë dallimet ndërmjet Tiranës dhe Partizanit, duke qenë se keni luajtur për të dyja këto ekipe. Mund të them që këtu te Tirana kemi një trajner shumë karizmatik si Erkandi që të bën të luash dhe të japësh më të mirën, pavarësisht se kushtet mungojnë. Të gjithë japim maksimumin që ekipi të dalë sa më mirë. Jemi skuadra e vetme që nuk ka në përbërje lojtarë të huaj, ndërsa Partizani së fundmi ka afruar lojtarë amerikanë. Këtu te Tirana i kemi vënë edhe një bast vetes, për t’u treguar të gjithëve se sa vlejmë si lojtarë dhe se skuadrat që kanë mundësi financiare kanë bërë gabim që kanë marrë lojtarë amerikanë që nuk është se po bëjnë diferencën. Të gjithë këto ekipe si Partizani, Goga, Vllaznia apo Kamza që kanë lojtarë të huaj ne i kemi mundur dhe me Teutën na shpëtoi fitorja nga duart vetëm në çastet e fundit. A jeni i kënaqur me ecurinë e Tiranës në këtë kampionat? Ecuria jonë deri tani duhet konsideruar shumë e mirë. Kemi humbur disa takime, të cilat duhet t’i kishim fituar, si fazën e parë me Vllazninë e Kamzën apo edhe këtë të fundit me Teutën. Momentalisht pretendojmë që të arrijmë edhe vendin e tretë, e më pas sigurisht që do të synojmë titullin kampion. Si do ta komentoni ardhjen e lojtarëve të shumtë të huaj në Shqipëri? Afrimi i lojtarëve të huaj është diçka pozitive për sa i përket rritjes së nivelit të kampionatit, por jo në këtë sasi, pasi numri është i ekzagjeruar. Ky fenomen që po ndodh tani në Shqipëri, ka ndodhur në Kosovë kohë më parë, ku të gjitha ekipet merrnin lojtarë nga jashtë duke bërë që vendësit të përfundonin në stol dhe gradualisht niveli i basketbollit ra. Me skuadra që kanë në formacion 4 lojtarë të huaj nga 5 gjithsej kuptohet që është diçka “vrasëse” apo penalizuese për kampionatin vendës dhe rrjedhimisht edhe për skuadrën kombëtare. Të kthehemi te ndeshja e fundit ndaj Teutës, ku skuadra juaj pati kontestime ndaj arbitrimit. Çfarë ndodhi saktësisht në atë takim? Ne kishim një avantazh prej 8 pikësh, kur mungonin rreth 6 minuta lojë. Ishte një rast kur gjyqtari dha një faull personal, i cili neve nuk na u duk i tillë. Ky vendim rezultoi decizive, pasi ktheu lojën në favor të Teutës, ndërkohë që edhe koshi i fundit që ata realizuan ishte me shumë fat. Megjithatë, edhe ne kemi pjesën tonë të fajit, pasi nuk duhet ta kishim çuar ndeshjen deri në atë pikë, por duhet ta kishim administruar më mirë. Cilin ekip shikoni si rivalin kryesor në luftën për titull? Momentalisht mendoj se është Goga Basket, pa harruar edhe skuadrën e Teutës. Ndërsa për sa i përket Partizanit, nuk mendoj se do të kemi probleme në sfidat që do të kemi me ta.