Rexhinaldo tremb Kukësin, në Korçë vlen vetëm fitorja
Sulmuesi: Shpresoj të jem gati për Skënderbeun
Barazimi me në Durrës ka komplikuar kualifikimin e Kukësit për në gjysmëfinalet e Kupës së Shqipërisë. Dhe sikur të mos mjaftonte fakti që Teuta i barazoi për vetëm 4 minuta, tashmë rrezikojnë edhe Arturo Rexhinaldon. Autori i golit të parë la fushën i dëmtuar dy minuta pasi filloi pjesa e dytë. Ai kërkoi ndërrim, duke krijuar panik në kampin verilindor. E megjithatë, vetë mozambikasi shpreson që të mos ketë asgjë serioze dhe të jetë gati për Skënderbeun. "I lumtur që shënova një gol, por i trishtuar për zëvendësimin pasi u lëndova. Shpresoj të mos jetë asgjë serioze dhe të ndihmojë ekipin të shtunën. Duke barazuar me dy gola jashtë shtëpie, shkojmë me një avantazh në ndeshjen e dytë. Forca Kukësi", shkruante Rexhinaldo në llogarinë e tij në "Instagram". Sulmuesi dje nuk ka dalë në stërvitje, po ashtu si pjesa tjetër e grupit që luajti në Durrës nga minuta e parë. Stafi teknik kishte vendosur që t'i linte pushim titullarët. Afrikani ka marrë një goditje në gju, që e lë pezull për ndeshjen e kësaj fundjave. Nga ana tjetër, janë drejtuesit e Kukësit që besojnë se lojtari do jetë gati. Rexhinaldo do të kryejë sot vizitat përkatëse dhe pas tyre do të merret edhe vendimi nëse ia del ose jo. Me shumë gjasa, 28-vjeçari do të jetë gati ndaj Skënderbeut.
- Dy fitoret radhazi ndaj Kamzës e Luftëtarit në kampionat bënë që morali i skuadrës veriore të rritej dhe ajo u reflektua edhe ndaj Teutës në Kupë. Skuadra e Cungut dominoi takimin për 80 minuta, duke qenë në avantazh 2-0 dhe në fund u ndëshkua. E megjithatë, presidenti Safet Gjici nëpërmjet drejtueseve u kërkoi lojtarëve që të fitojnë në Korçë dhe pastaj të mendojnë për kualifikimin. Të gjithë janë të bindur për kalimin më tej në Kupë, aq sa edhe kreu i klubit ka vendosur që të anulojë vendimin e marrë për pezullimin e rrogave. Llogaritë për Skënderbeun janë të qartë, pasi vlen vetëm fitorja. Kur dihet që luajnë një ditë para Partizanit, kanë shansin e madh që duke fituar të fusin nën presion kundërshtarin.