Anglezi: I bindur, fitojmë Kupën e Shqipërisë
Flet sulmuesi i bardhebluve pas takimit me Laçin
Majkëll Ngo është lideri i Tiranës së re. Golat e tij kanë ndryshuar skuadrën bardheblu dhe praktikisht i kanë dhënë kualifikimin Tiranës për në gjysmëfinalen e Kupës së Shqipërisë. Majkëll Ngo ishte përzgjedhur nga të gjithë si lojtari i ndeshjes. Dy gola dhe një asist e përligjin këtë. Anglezi është shfaqur i kënaqur pas takimit. Në një prononcim për “Supersport”, sulmuesi u shpreh se çdo lojtar që vesh fanellën e Tiranës duhet të jetë lider në fushë duke dhënë edhe ndryshimet nga pjesa e kaluar e sezonit, ku Tirana nuk po bënte paraqitje të mira.
Ngo, jeni kthyer në lider i skuadrës?
Kur futem në fushë, kam një dëshirë që të luaj mirë dhe të jap 110%. Por nuk jam unë i vetmi lider, edhe 10 lojtarët e tjerë që ishin sot në fushë. Ju e patë lojën dhe besoj se jeni dakord me mua. Të vazhdojmë kështu të gjithë së bashku.
Si ka ndryshuar një skuadër si Tirana nga 2018-ta në 2019-ën?
Jemi më të bashkuar si skuadër, trajneri ka bërë një punë shumë të mirë. Në 2018ën nuk sakrifikonim për njëritjetrin. Këtë vit, shihet në rezultate që ne po sakrifikojmë për njëri-tjetrin dhe kjo na bën një grup më të fortë.
Keni luajtur pak më ndryshe se në takimet e tjera...
Sot qëndrova më afër zonës, pasi Laçi luan një sistem loje të pabesueshëm. Ata e mbingarkojnë mesfushën dhe lënë hapësira në prapavijë, prandaj luajta në vijën e fundit, krahas mbrojtësve të qendrës. Pastaj, sot(dje) kisha fat dhe i shfrytëzova rastet.
Cili është objektivi i Tiranës në këtë moment që flasim, si në kampionat dhe në Kupë?
Tirana ka forcën të fitojë Kupën dhe të parakalojë shumë skuadra në renditje sa i takon kampionatit, gjithmonë nëse bëjmë lojën tonë dhe marrim rezultatet e duhura.
Mund të themi se jeni ambientuar shumë mirë me Superioren...
Nëse je një lojtar i mirë dhe mendja jote është në vendin e duhur, nuk shikoj asnjë arsye pse nuk mund të luash mirë. Unë personalisht i di aftësitë e mia. Tani e kuptoj trajnerin dhe lojtarët, gjërat do të bëhen edhe më mirë. Gjithçka do të shkojë ashtu siç duhet.