Luftëtarin e josh Kupa, Dinamo i mohonte finalen 37 vite më parë
Gjirokastritët kanë qenë në gjysmëfinale me trajner Hito Hitajn
Fitorja 1-2 në “Elbasan Arena” ndaj Partizanit, në ndeshjen e parë si udhëtues, të vlefshme për turin çerekfinal të Kupës së Shqipërisë, ka shtuar entuziazmin te gjirokastritët. Ky mund të jetë viti i duhur për Luftëtarin për të shkuar deri në fund në kompeticionin e dytë më të rëndësishëm në vend. Në historinë 90-vjeçare të klubit bluzi, arritjet në Kupë janë vetëm prania dy herë në gjysmëfinale. Për herë të parë në vitin 1968, Luftëtari u përball po ndaj Partizanit, por në gjysmëfinale, teksa u mposht me shifrat 1-4 nga të kuqtë. Në atë periudhë ndeshjet në këtë tur kanë qenë me eliminim direkt dhe jo me sistem vajtjeardhje. Ndërsa për herë të dytë në gjysmëfinale, Luftëtari ka arritur në vitin 1982, kur i drejtuar nga trajneri legjendar, Hito Hitaj, nuk mund të kualifikohej për në finale pas dy përballjeve me Dinamon. Në ndeshjen e parë të luajtur në Gjirokastër, pikërisht më 20 prill 1982, blutë e kryeqytetit fituan me shifrat 0-2 falë golave të Andrea Markos dhe të ndjerit Vasillaq Zëri me penallti. Në atë vit gjirokastritët kishin në përbërje yje të futbollit shqiptar si Kalluci, Boni, Seiti dhe Sefedin Braho. Por, ëndrra për të shkuar në finalen e Kupës mori fund, pasi edhe në takimin e kthimit në Tiranë më 27 prill 1982, Luftëtari nuk shkoi më shumë se barazimi 0-0. “Të jem realist, nuk i mbaj mend mirë si ndeshje, por ka qenë një edicion ku i patëm mundësitë për të shkuar deri në finale, edhe pse nuk ia arritëm. Shpresoj që atë që nuk bëri ai brez, ta bëjë ky i sotmi, por është herët për të folur”, ka thënë dje për gazetën ish-trajneri i Luftëtarit, Hito Hitaj, i cili drejtoi një brez të artë në vitet ’70-’80, ku maksimumi ishte shpallja nënkampion i vendit. Ndërkohë, 37 vite më pas, Luftëtari ka shansin të përsërisë historinë, duke shkuar për herë të tretë në gjysmëfinale dhe tentuar më pas finalen. Por, skuadrës së drejtuar nga Julian Ahmataj i duhet të luajë edhe një 90-minutësh për të kompletuar kualifikimin. Fitorja 1-2 në transfertë e favorizon ekipin bluzi, por gjithçka do të shikohet në ndeshjen e 27 marsit, pasi specifika e Kupës nuk të lë të bësh llogari. Gjithsesi, Luftëtarit i mjafton edhe barazimi apo edhe një humbje 0-1 që të shkojë në gjysmëfinale.