Vllaznia, “avullojnë” lojtarët
Trajneri Hasan Lika u beson kryesisht vendësve, vetëm Xhunior ka lënë gjurmë
Vllaznia po përjeton një prej sezoneve më të vështira në historinë e vet si klub 100vjeçar, ku është e detyruar të luajë në Kategorinë e Parë dhe të luftojë për ngjitjen në Superiore. Shkodranët janë aktualisht +8 pikë nga vendi i dytë që mbahet nga Erzeni dhe synojnë që ta sigurojnë sa më shpejt elitën. Gjatë këtij kampionati, edhe pse në fillim të sezonit u trumbetua fakti që do të afroheshin lojtarë të huaj të talentuar dhe drejtori sportiv, Engin Firat, nënshkroi marrëveshje bashkëpunimi me disa akademi nëpër botë, duket se klubi sheh më shumë te vendësit.
ENIGMA E JANARIT Në merkaton e janarit, Vllaznia bëri vetëm një afrim. Në ditën e fundit që lejoheshin lëvizjet, shkodranët lajmëruan nënshkrimin e kontratës për një vit me sulmuesin nigerian, Izuna Kristofer Metu Jezus, vetëm 19 vjeç. Një lojtar i ri i talentuar, pjesë e akademisë “Derby Fotball Academy”, një prej më të mirave në Nigeri, me të cilën drejtuesit kuqeblu nënshkruan kontratë bashkëpunimi disa javë më parë. Por, edhe pse ka kaluar rreth një muaj e gjymsë, lojtari ende nuk ka mbërritur në Shkodër. Burime në klubin shkodran bëjnë të ditur se ka probleme me dokumentacionin, por askush nuk jep një sqarim të qartë se përse ndodh kjo vonesë.
TË HUAJT - Ndërkaq, gjatë merkatos së verës së kaluar, me Vllazninë u bashkuan edhe tre lojtarë të huaj, mbrojtësi Dan Ignat dhe sulmuesit Xhunior dhe braziliani Eziamaka. Me kalimin e javëve, u vu re që vetëm braziliani Xhunior po shkëlqente, ndërsa në 19 ndeshje ka shënuar nëntë gola. Edhe Dan Ignat bëri një paraqitje shumë të mirë në pjesën e parë të sezonit, por në janar kërkoi
largimin nga skuadra, gjë që nuk u lejua nga drejtuesit. Ai ka luajtur në 16 takime dhe ka shënuar 1 gol. Në javët e fundit nuk është preferuar shumë nga trajneri Lika, kjo për shkak se nuk bëri fazë përgatitore. Ndërsa, sulmuesi nigerian Eziamaka duket se është jashtë planeve të stafit. Ai ka luajtur vetëm në nëntë ndeshje duke shënuar dy gola.
VENDËSIT - Trajneri Hasan Lika njihet për përparësinë që u jep futbollistëve vendës. Ai preferon më shumë të rinjtë dhe lojtarët që e njohin mentalitetin e futbollit
shqiptar. Vllaznia e këtij sezoni deri tani është mbështetur te vendësit që përbëjnë 80% të skuadrës. Dhe ekipi në 19 javë që janë luajtur ka arritur ta justifikojë veten duke qenë +8 pikë nga Erzeni i vendit të dytë. Deri në fund të këtij kampionati, pritet që tekniku Lika t’i besojë të njëjtit formacion që ka provuar edhe në javët e fundit, ndërsa rezultatet kanë qenë të kënaqshme. Këtë fundjavë, grupi do të jetë edhe më i kompletuar me rikthimin e disa lojtarëve të dëmtuar që tashmë e kanë kapur formën e tyre maksimale.