Kapitenia Bujari, e bindur: Fitojmë derbin dhe kampionatin
Lufta për titullin kampion në Kategorinë e Parë A në basketbollin e femrave sa vjen e bëhet më e ndezur. Një betejë ku duket se janë të përfshira SHKB Tirana kryesuese, SHB Tirana e vendit të dytë, pa harruar as kampionet në fuqi të Flamurtarit. Megjithatë, skuadrat që po rivalizojnë më së shumti njëra-tjetrën janë dy ekipet kryeqytetase, të dyja të përforcuara me lojtare të shumta nga jashtë. SHKB Tirana që drejtohet nga Erdal Borova udhëheq kampionatin që nga java e parë e deri tani, por skuadra tjetër bardheblu SHB Tirana që drejtohet nga Mirza Alibegaj ka pasur një ecuri të shkëlqyer gjatë vitit 2019, ku regjistron vetëm fitore dhe ka arritur të shpallet edhe fituese e Kupës së Shqipërisë. Këtë fundjavë dy skuadrat kryeqytetase do të jenë sërish përballë njëratjetrës në derbin që do të luhet në sallën sportive "Farie Hoti". Në prag të kësaj sfide, kapitenia e SHKB Tiranës, Eliverta Bujari duket shumë optimiste dhe e bindur për një sukses të ekipit të saj. Në një prononcim për "Panorama Sport", Bujari e komenton kështu derbin: "Do të luajmë në 'Farie Hoti', sallë e cila për 15 vite ka qenë shtëpia ime dhe e njoh me pëllëmbë çdo pjesë të asaj fushe, si unë ashtu edhe të gjitha vajzat. Më vjen keq që politika të ndryshme të brendshme në klub prodhuan këtë ndeshje të çuditshme. Megjithatë, Tirana është e madhe dhe ka vend për të gjithë, por produktet e vërteta të shkollës tiranase jemi disa nga ne. Uroj që të shtunën të dalim fitimtare dhe besoj se këtë vit do të arrijmë të shpallemi kampione dhe të vendosim respektin që meritojmë pas gjithë atyre padrejtësive që këtë sezon iu bënë skuadrës sonë", përfundoi prononcimin e saj organizatorja e SHKB Tiranës. Ndërkohë, java e 16-të do të ngrejë sot siparin me ndeshjen ndërmjet Studentit dhe Vllaznisë, sfidë e cila do të zhvillohet në orën 12:00 në pallatin e sportit "Asllan Rusi". Të shtunën në orën 12:00 Elbasani pret kampionet në fuqi të Flamurtarit, ndërsa derbi i kryeqytetit do startojë në orën 17:00 në sallën "Farie Hoti".