Zidan “shëron” Iskon dhe hedh grepat për Eriksenin
Mesfushori bën prapakthehu, vendos të qëndrojë
Shkarkimi i Santiago Solarit dhe rikthimi i Zinedin Zidanit ka bërë më të lumtur një lojtar mbi të gjithë në ambientin madrilen, Iskon. Me trajnerin argjentinas, marrëdhëniet e mesfushorit me klubin arritën në pikën e tyre më të ulët dhe përjashtimet e tij nga 18-shja ishin kthyer një situatë normale gjatë këtyre katër muajve të fundit. Isko e kishte vendosur që nëse Solari do të vazhdonte të ishte trajner, ai në fund të sezonit do të kërkonte që të largohej nga "Bernabeu". Por rikthimi i teknikut francez përmbys edhe skenarët për ish-talentin e Malagës. "AS" raporton se tashmë ai ka vendosur që të qëndrojë dhe gjithë ambienti i tij e konfirmon një gjë të tillë njëzëri: "Isko nuk do të largohet nga Madridi". Pavarësisht se edhe me Zidanin, fantazisti nuk ishte gjithnjë një titullar i padiskutueshëm, Isko e pranon një gjë të tillë, por vlerëson faktin se ai do të ketë mundësi të barabarta me shokët e tjerë të skuadrës për të luftuar për një fanellë titullari. Edhe me Zizunë, Isko ka pasur përplasje. Gjatë viteve të francezit në "Bernabeu", ai luajti vetëm 48% të minutave dhe u përdor në 77% të 149 ndeshjeve. 76% të rasteve kur ai ishte titullar u zëvendësua dhe kjo shkaktoi pakënaqësi, ashtu siç ndodhi në 27 shkurt 2018, kur Zidan e zëvendësoi në 69' dhe ai e la fushën duke ecur, pavarësisht se rezultati ishte 0-0. Edhe gjatë sezonit 2015-16, një tjetër zëvendësim ai e mori shumë keq. Bëhet fjalë për 13 marsin 2016, kur Zidan vendosi ta zëvendësojë me Kovaçiçin pas një ore lojë dhe Isko reagoi duke flakur fanellën dhe goditur një shishe uji. Gjithsesi, aq keq kishin precipituar gjërat me Solarin, sa rikthimi i Zidanit në stol është një lajm i shumëpritur edhe për rebelin e kampionëve të Europës.
Eriksen - Rikthimi i Zidanit në Madrid ka riaktivizuar edhe operacionin për transferimin e Kristian Eriksenit nga Totenhemi sipas shtypit britanik. "Mirror" pretendon se francezi ia ka kërkuar Florentino Perezit mesfushorin danez me çdo kusht në verë. Situata e lojtarit të Mauricio Poçetinos është delikate, sepse kontrata e tij skadon në vitin 2020 dhe nëse anglezët mendojnë se nuk ka më mundësi për të arritur një marrëveshje për të rinovuar kontratën, atëherë presidenti Daniel Levi do të jetë i detyruar që ta shesë për ofertën më të lartë. Dhe ky është skenari më i mundshëm këtë verë, sepse Levi do preferonte ta shiste futbollistin më mirë në korrik sesa të priste derisa Eriksen të largohet me parametër zero në fund të vitit të ardhshëm.