Bekenbauer e do te Bajerni, Klop: Nder, por nuk u duhem
"U treguam dhëmbët, s'e kam sfidë personale me Bajernin"
Rekordi i tij me Bajer nin, skuadrën me të cilën është ndeshur më shumë në karrierën e tij, nuk flet për të. Por këtë herë strategu Klop nuk kishte Dortmundin, por tjetër armë, Liverpulin. "Është diçka me të vërtetë speciale. Tani perceptohemi si një skuadër e klasi, më shumë sesa ne mendojmë për veten që jemi, sepse jemi ende në fazë përmirësimi për të thënë diçka të tillë. Donim të luanim shumë më tepër futboll në këtë ndeshje, në pjesën e dytë ia dolëm. E kontrolluam atë dhe i treguam dhëmbët Bajernit", thotë trajneri gjerman, i cili si të gjithë, e heq petkun e favoritit tani që kanë mbetur 7 rivale në garë. "Ka ekipe me të vërtetë të mira. Cilido që të jetë rivali ne do ta mirëpresim. Djemtë e dashurojnë këtë kompeticion. Treshja e sulmit ishte e shkëlqyer. Është lajm i mirë për Anglinë, që ka edhe tri skuadra të tjera. Është shumë e vështirë ta fitosh këtë garë". Përpara ndeshjes, Franc Bekenbauer e lartësoi figurën e tij dhe shprehu dëshirën që një ditë ai të drejtojë klubin e Bajernit, por Klop pasi buzëqeshi, kishte këtë përgjigje për legjendën e futbollit gjerman: "Unë nuk mendoj se Bajerni ka nevojë për këtë në të ardhmen e afërt, as për mua. Por nëse Franc flet për mua, atëherë është një nder. Ai është një idhull". Pastaj edhe pyetja nëse ka shije speciale mposhtja e Bajernit për shkak të rivalitetit me Dortmundin? "Unë nuk doja thjesht të mundja Bajernin. Doja të fitoja me Liverpulin. Jam i sigurt se do kem shumë tifozë të lumtur nga Dortmundi dhe nëse unë u jap një dorë, atëherë është fantastike gjithashtu". Pastaj një analizë e asaj që ndodhi në fushë: "Në një ndeshje si kjo ti nuk mund të pushosh kurrë. Është një fitore e merituar. Jam shumë krenar për djemtë. Henderson ndrydhi kaviljen. Shpresojmë të mos jetë shumë serioze. Golin e parë do doja ta shikoja 1000 herë. Organizimi i Van Dajkut në goditjet standarde është gjithnjë i rrezikshëm. Ai është një kërcënim i madh. Ka staturën dhe fuqinë dhe shënoi një gol të madh. Në një ndeshje si kjo do të ketë gabime, por duhet të qëndrosh në lojë. Të kontrollosh momentet që duhet".