Nedved: Kujdes Ajaksin! Atletiko ofendoi CR7-ën
"Ronaldo s'do penalizohet, për Alegrin vendosim në qershor"
Duke parë një nga çiftet e shortit të djeshëm të Ligës së Kampionëve në Nion, mendja e shumë sportdashësve do ketë bërë një udhëtim në të shkuarën: fillimisht në edicionin 1972-'73, më pas në atë 1995-'96. Në këtë të fundit, Juventusi ngriti trofeun pas goditjes së penalltive (4-2), me 90' e mbyllura 1-1, duke marrë hak për humbjen 1-0 në finale ndaj Ajaksit. Përballje të tjera ka pasur, ku precedentët buzëqeshin për juventinët: 7 fitore, 4 barazime, 2 humbje. Tani, më 10 dhe 16 prill do luhet vajtja dhe ardhja e çerekfinaleve.
"AJAKSI, KËTU ME MERITË"
Prezent në hedhjen e goglave, zv.presidenti bardhezi Pavel Nedved ka dhënë komentin e tij për mikrofonat e "Sky Sport": "Nuk duhet të jemi të lumtur apo të trishtuar për kundërshtarin, jam i sigurt se do jenë ndeshje të bukura. Ajaksi e ka merituar këtë fazë, pasi eliminoi Realin e Madridit, ndaj duhet të bëjmë shumë kujdes". Sigurisht, edhe "Zonja" në krahun tjetër, luan 1/4-at pasi përmbysi Atletikon e Madridit nga 2-0 në 3-0: "Në Madrid dolëm të humbur duke pësuar dy gola nga goditjet standarde, por ishim të vetëdijshëm që në fushë nuk kishte zbritur Juvja e vërtetë: këtë e treguan në Torino. Përpara kthimit isha shumë i qetë, sepse kisha kuptuar që do ndodhte diçka e rëndësishme: kaluam në çerekfinale, një arritje e madhe për ne dhe tifozët tanë. Tani do luajmë dy sfida me entuziazmin në maksimum".
"RONALDON E FYEN"
Në përfundim të takimit të dytë me Atletikon, Kristiano Ronaldo bëri një gjest më pas i diskutuar gjatë. Në Spanjë kanë folur edhe për ofendime të portugezit drejtuar tifozëve madrilenë. Nedved, megjithatë, nuk u trembet pasojave nga UEFA: "Nuk kemi frikë nga skualifikime, ishte një gjest që qëndroi në fushë dhe emocionet e atij momenti duhet të qëndrojnë atje. U shfry pasi e sulmuan si në Torino po ashtu edhe në Madrid, ndaj dyshoj se do ketë sanksionime".
JUVE-ALEGRI
Juventusi do luajë sfidën e parë me holandezët në Amsterdam, pra "bileta" e gjysmëfinales në çdo rast do pritet në Torino: "Efektin e 'Allianz Stadium' e shfaqëm kundër Atletikos, ku tifozët krijuan një atmosferë fantastike. Ishte e mrekullueshme
të përjetonim këto mbrëmje Champions-i, duhet të jenë gjithmonë festive". Në fund, Nedved ka komentuar lidhur me të ardhmen e Masimiliano Alegrit: "Tani në mars do takohemi me presidentin
dhe trajnerin, më pas në qershor do merret vendimi përfundimtar. Jemi shumë të lumtur nga Alegri: kemi një avantazh të jashtëzakonshëm në kampionat dhe në Champions po ndjekim rrugën e duhur".