Jurgen Klop bën të vështirin: Nuk patëm fat në short
Trajneri i Liverpulit i druhet Portos në çerekfinalet e Champions-it
Pasi eliminoi Bajernin e Mynihut me një leksion në “Allianz Arena”, Liverpuli dje ka njohur nga goglat e Nionit kundërshtarin e radhës në fazën çerekfinale të Ligës së Kampionëve. “Reds” do të ndeshen ndaj Portos, e cila në këtë pikë të kompeticionit ka mbërritur pasi mundi një javë më parë Romën. Si gjithnjë origjinal në deklaratat e tij, Klop nuk ka pranuar se ekipin e tij e ka përkëdhelur fati gjatë shortit, përkundrazi. “Nuk mendoj se për Liverpulin fakti që do të ketë përballë Porton përbën një avantazh. Nuk ka asnjë arsye të veçantë, thjesht mendoj se nuk patëm edhe aq fat”, u shpreh tekniku gjerman për “Daily Mail”. Porto dhe Liverpuli janë përballur edhe gjatë sezonit të kaluar dhe pikërisht ato sfida janë motivi i qetësisë së Klop, i cili deklaratën e tij e vijoi duke thënë se: “Porton e njohim, sepse kemi luajtur përballë sezonin e kaluar. Duke parë rezultatet mund të themi se ishin ndeshje pozitive, por njëkohësisht ishin edhe të çuditshme. Në ndeshjen e kthimit patëm përballë një skuadër me karakter dhe cilësi. Porto ka ndryshuar disa gjëra nga një sezon më parë, por sidoqoftë kemi shumë respekt për kundërshtarët tanë, ndaj për të kaluar turin do të duhet ta përgatisim ndeshjen në mënyrën më të mirë dhe të dhurojmë dy takime niveli”. KONTRATA E UAJNDALDUM – Xhorxhinjo Uajndaldum është emri i radhës në listën e drejtuesve të Liverpulit për sa u përket rinovimeve. Pas Salahut, Manea, Firminos, Aleksander-Arnoldit, Gomezit dhe Hendersonit, duhet të jetë holandezi ai që duhet të firmosë, por në lidhje më këtë aspekt nuk ka asnjë të re. Të paktën jo nga ana e mesfushorit, i cili ka sqaruar për mediat: “Nuk kam folur ende me klubin. Kontrata vlen për klubet, por për mua nuk është problem për arsyen e thjeshtë se jam njeri pa probleme. Do të shoh se çfarë do të ndodhë. Dy vite më parë (2017) nënshkrova për pesë vite me Liverpulin, ndaj, aktualisht unë e kam një kontratë”.