Spaletit i rikthehen 7 “ushtarë”
Duhet të ndryshojë edhe mentaliteti. Nevojitet një Inter "i çmendur"
"Duhet të kthejmë faqe". Është kjo fraza që duhet të përsërisin të gjithë tek Interi pak orë nga derbi kundër Milanit. Sepse tashmë "kushërinjtë" kanë kaluar 1 pikë përpara në klasifikim dhe nesër në 20:30 diferenca mund të thellohet. Megjithatë, në të kundërt të sfidës së të enjtes në Ligën e Europës kundër Ajntrahtit të Frankfurtit, ku humbja 0-1 nxori zikaltrit përfundimisht nga kompeticionet europiane, trajneri Luçiano Spaleti këtë herë mund të buzëqeshë. Kjo, pasi infermieria po zbrazet dhe në listën e të skualifikuarve për kartonë nuk figuron asnjë interist.
ZGJEDHJE - Kundër "Djallit" në fakt do ketë më shumë mundësi zgjedhjeje. Me gjermanët i mungonin plot 9 lojtarë, mes dëmtimeve dhe të pezulluarve: u detyrua të ripërdorë Ranokian qendërsulmues dhe dy talente nga U-19... Tani mund të përdorë Brozoviçin dhe Mirandën (të ruajtur me Frankfurtin); Lautaro Martinezin dhe Azamoahn (me numër të plotësuar kartonësh në Europë); Zhoao Marion, Galjardinin dhe Dalbertin (tre elementët jashtë listës UEFA). Megjithëse edhe rivali Xhenaro Gatuzo nuk ka asnjë opsion "të bllokuar": i vetmi jashtë nga kuqezinjtë është Xhakomo Bonaventura, i cili mbylli sezonin pas operacionit në gju.
MENTALITET - Me rikthimin e yjeve, megjithatë, do duhet të ndryshojë edhe mentaliteti dhe të largohet frika, dy problemet kryesore të zikaltërve. Sepse nëse Milani në kampionat nuk humbet nga dhjetori me Fiorentinën, Interi theu serinë negative vetëm me Spalin, pas një barazimi me Fioren dhe një humbjeje me Kaljarin. Megjithatë, pavarësisht se në fushë nuk do jetë bomberi Mauro Ikardi, në raste të tilla shfaqet interizmi "i çmendur".