Lika, në sulm: Dinamos ia kemi marrë dorën

"Dikur ishte spektakël, tani na duhen vetëm pikët"

Trajneri i Vllaznisë, Hasan Lika, kërkon që ekipi i tij të ruajë vazhdimësinë e fitoreve edhe në ndeshjen e sotme ndaj Dinamos. Për të, përballja me blutë është e vështirë, por sërish ekziston optimizmi për të arritur te rezultatet pozitive. Vllaznia, sipas tij, ka përfituar nga kjo ndërprerje, teksa i janë kthyer për këtë takim titullarët që kanë munguar në përballjen ndaj Korabit.

Profesor, kampionati gradualisht po shkon drejt fundit dhe kuptohet që edhe sfida me Dinamon ka shumë rëndësi. Çfarë prisni nga kjo ndeshje?

Kjo është ndeshja e dytë e fazës së tretë dhe ka akoma të tjera për të luajtur, kështu që ne përgatitemi me seriozisht ashtu si gjithmonë për të kaluar me sukses çdo kundërshtar që kemi përballë. Nuk ka rëndësi nëse luajmë brenda apo jashtë fushës sonë.

Ka ndikuar për mirë apo për keq ndërprerja e kampionatit?

Ishim në atmosferën e ndeshjeve, megjithatë kjo ndërprerja na shërbeu në një aspekt tjetër. Ndonjë nga lojtarët që kemi pasur të dëmtuar kishte më shumë kohë në dispozicion për t'u rikuperuar, pavarësisht se kemi ende ndonjë mungesë të rëndësishme. Megjithatë, Gilman Likës, Arsen Hajdarit apo ndonjë tjetri u ka shërbyer pozitivisht kjo periudhë, ashtu siç mund t'i shërbejë edhe ndonjë skuadre tjetër që mund të ketë probleme të tilla.

Pavarësisht se në pozita të ndryshme, Vllaznia dhe Dinamo gjithmonë kanë dhuruar futboll të bukur. Do ndodhë kështu edhe nesër(sot)?

Kjo është e vërtetë, gjithmonë kanë dhuruar futboll spektakolar. Vllaznia-Dinamo gjithmonë kanë qenë ndeshje të bukura, sfida me gola, të luftuara, kështu që ne jemi përgatitur si duhet për këtë ndeshje, sepse për ne mbetet sërish Dinamo, pavarësisht se në çfarë pozicionesh jemi.

Luhet përsëri në "Reshit Rusi", u mësuat me këtë fakt apo do të dëshironit të luanit në stadium?

Duhet t'i përshtatemi këtij fakti për më tepër që kemi të bëjmë me një ndeshje të rëndësishme të Kombëtares në stadiumin e Shkodrës, prandaj pa mbaruar ajo, jemi të detyruar të luajmë sërish këtu.

Dinamo nuk ia ka dalë të marrë asnjë pikë ndaj Vllaznisë në dy ndeshjet e para, por do ta synojë këtë gjë te kjo ndeshja e tretë. I frikësoheni kundërshtarit?

Ne duhet të jemi të kujdesshëm dhe të mos mendojmë se do ta kemi të lehtë sepse do kemi përballë një kundërshtar të

fortë. Një kundërshtar, i cili na ka vënë në vështirësi, sidomos në ndeshjen e dytë në Tiranë ku me mundim kemi fituar 1-0. Kemi të bëjmë me një ekip që në fillimet e tij këtë sezon kishte problemet e organizimit, por tani është një skuadër që është forcuar, është plotësuar me futbollistë dhe ka zhvilluar një kampionat të mirë, pavarësisht disa ndeshjeve të fundit jo në nivelin e duhur. Besojmë se do të vazhdojmë me rezultate pozitive deri në fund të kampionatit.