Kale pret rrogat: Botë e gënjeshtërt, punoj si vullnetar
Mesfushori shfryn sërish: Lutem për të vërtetën
Shpërthen Elton Kale. Brazilianit të Flamurtarit duket se i ka ardhur “në majë të hundës” kriza financiare. Vonesa e vazhdueshme e pagave nuk po pritet aspak mirë prej mesfushorit, gjë që e ka shprehur edhe në rrjetet sociale. Me postimet e fundit në “Instagram” lë të dyshosh se ai mund të marrë edhe ndonjë vendim ekstrem për të bojkotuar stërvitjen deri edhe te ndeshjet. Ky mesazh duket gjithashtu edhe si një paralajmërim për drejtuesit e klubit. Kale ka shkruar në rrjetet sociale disa mesazhe ku vendos në dukje punën vullnetare që sipas tij po bën. Por, braziliani nuk nguron të flasë edhe për gënjeshtrat, ndërsa thotë se vetë do të lutet për të vërtetën. “Një tjetër ditë nga puna ime vullnetare. Në këtë botë të mbushur me gënjeshtra, unë do të lutem për të vërtetën”, shkruante 30-vjeçari. Por këto postime nuk kanë zgjatur shumë, pasi braziliani duket se është bërë pishman për mllefin e shfaqur publikisht, ndaj edhe i ka fshirë.
PARALAJMËRIMI - Nuk është hera e parë që Elton Kale tenton të shfaqë pakënaqësinë e tij për situatën që po kalon ekipi i tij. Ai ka paralajmëruar largimin nga Flamurtari edhe pak kohë më parë. Në një postim të bërë më 19 shkurt në “Instagram”, ai pati ngarkuar një foto sa për të qeshur, aq edhe ironike. Ai kishte shpërndarë një fotografi të formacionit të vlonjatëve, duke vendosur edhe numrat e largimeve sipas radhës dhe shkruante: “Kush është tjetri...?”. Në njëfarë mënyre braziliani ka “hapur bastet” për të larguarin e radhës, që mund të jetë edhe ai, marrë shkas edhe nga ngjarjet e fundit. Pas largimeve të Allës, Torasës, Useinit, Alveshit, Siljanovskit dhe Bushiçit, nuk është çudi që nga Flamurtari të largohet edhe Kale, edhe pse braziliani nuk ka ku të shkojë, për shkak se kampionati është drejt fundit, por mund t’i drejtohet gjyqit për pagat e pamarra.
BOJKOTI – Ishte fillimi i muajit mars dhe pragndeshja me Kastriotin kur Elton Kale bojkotoi stërvitjen. Ai nuk zbriti në fushë, duke u justifikuar me faktin se kishte temperaturë. Asokohe pati dyshime se simuloi, duke u hequr si i sëmurë dhe kjo për shkak të vonesës së pagave. Të paktën këtë la të kuptohet vetë 30-vjeçari, pasi edhe pse ka thënë që gjendja e tij shëndetësore nuk ishte më e mira, ka zhvilluar vrap gjatë pasdites në stadium. Ai e ka njoftuar klubin zyrtarisht se ka temperaturë, por fakti që ka kryer përgatitje i diferencuar ka bërë që edhe vetë vlonjatët të dyshojnë. Madje, situata u bë edhe më e paqartë pas një video që ka postuar vetë lojtari në “Instagram”, ndërsa po vraponte në plazh. Të gjitha këto detaje të bëjnë të mendosh se braziliani thjesht ka shfaqur shenja revolte për vonesat e rrogave, pasi një njeri me temperaturë, vështirë se mund të dalë të vrapojë sa në stadium e aq më tepër në plazh. Pra, gjithçka të bën të mendosh se braziliani po i jep ultimatum të hapur klubit.