Sibo-Pervan, ja plani i korçarëve
Drejtuesit po mendojnë për të ardhmen, gati negociatat me Uatford dhe Osijek
Fitorja e fundit dhe mbi të gjitha cilësia në rritje që po dëshmojnë nga java në javë prurjet e janarit kanë kënaqur stafin drejtues me në krye Ardjan Takajn. Ndaj, edhe në klub kanë filluar që të mendojnë për “blindimin” e atyre që mund të ofrojnë garanci jo vetëm për të ardhmen, por edhe të gjenerojnë parà. Nëse për Shqipërim Taipin dhe Idriz Toskiç çështja është e mbyllur, pasi korçarët disponojnë kartonin e plotë të tyre, ndryshe qëndron puna për Kuasi Sibon dhe Marko Pervan. Mesfushori ganez është transferuar si i huazuar nga anglezët e Uatford, ndërsa kroati vjen po ashtu në formë huaje prej Osijekut. Duke qenë se ata janë duke bindur me paraqitjet e tyre, drejtuesit bardhekuq kanë filluar të mendojnë seriozisht për blerjen e kartonit. Cilësia në mesfushë është rritur ndjeshëm dhe si Sibo ashtu edhe Pervan janë kthyer në titullarë të padiskutueshëm në formacionin e Orges Shehit. Cilësinë që të dy futbollistët i japin mesit të fushës e ka vënë re edhe presidenti Ardjan Takaj, që pa u mbyllur ende kampionati aktual po mendon për sezonin e ardhshëm.
INTERESI - Burime pranë klubit bëjnë me dije se Skënderbeu, përmes drejtorit sportiv Haris Fakiç, ka filluar të interesohet pranë klubeve respektive nëse ekziston mundësia e blerjes së kartonit të dy lojtarëve në fjalë. Po të njëjtat burime bëjnë me dije se çështja mund të marrë një rrugë përfundimtare në fund të këtij sezoni dhe mbi të gjitha pas daljes së vendimit nga ana e KAS. Nga sa mësohet, të dy klubet që disponojnë kartonët e lojtarëve janë shprehur të hapur për një tratativë të mundshme. Sigurisht që me mbyllje të tillë, Skënderbeu fillon të mendojë për fuqizimin e ekipit për vitin tjetër dhe duke parë moshën e re të dy lojtarëve, mund të themi pa frikë se do të ktheheshin në “yjet” e së ardhmes.