Shehi: Jemi në garë, ja kur u bëmë tifozë me Kukësin
Fitorja e fundit përballë Kukësit duket se e ka rikthyer në identitet Skënderbeun. I këtij mendimi është edhe Orges Shehi, i cili hapur e ka thënë se janë ende në garë pas rezultateve të marra në dy javët e fundit. I ftuar në “News 24” nga emisioni “Sport News Plus” të moderatores Daljana Sejdia, trajneri ka folur edhe për ambiciet e skuadrës që ai drejton. “Jemi në garë. Nuk e kemi përjashtuar veten nga gara, edhe pse kishim rezultate jo të mira. Na vjen mirë që jemi kthyer me dy ndeshje të mira përballë dy rivalëve direkt. Me Kukësin ishte një përballje ndaj dy rivalëve që këto vite i kanë dhënë tonin futbollit shqiptar. Vinim pas një performance të mirë me Teutën dhe kjo ishte ndeshja e duhur për t’u kthyer aty ku ne dëshirojmë, aty ku ishim në javët e para. Nuk ka më mirë sesa të kthehesh drejt objektivave të garës. A e ndihmuam Partizanin? Do ta quaja vetëm fitore për skuadrën, nuk ndalem fare te kundërshtarët. E thashë që pas ndeshjes, që deri para tri ditësh na thoshin se luajmë për të mundur Partizanin, tani për t’i bërë favore. A jemi protagonistë? Po, prandaj jemi Skënderbeu, për të qenë protagonistë, pavarësisht se nuk kemi qenë në javët e fundit. Na vjen mirë që jemi kthyer te fitorja, edhe pse kishim Kukësin përballë. Ecuria negative na ka goditur shumë. Na mungojnë shumë pikë. Ndoshta në fillim, kur u organizuam kishim objektiv për të qenë në 3 vendet e para, më pas ‘oreksi’ na u shtua dhe patëm synime edhe më madhore. Besoj se tani jemi brenda objektivave. Do vazhdojmë të shohim përpara. A ka ndikuar sinjali pozitiv i KAS-it? Duke qenë se po i afrohemi datës, vjen një karikim dhe mobilizim i gjithë skuadrës. Kjo shërben për pak motivim më shumë. Besoj se do shërbejë për anë pozitive. Është një çështje që drejtuesit dhe avokatët po merren seriozisht. Është një çështje e ngritur kot. Jemi optimistë dhe besimplotë që këtë çështje do ta fitojmë. Ne kemi vetëm Zotin aleat. Unë kam 9 vite te Skënderbeu, jam si në shtëpi. Kemi arritur shumë suksese. Na bëhet qejfi kur skuadrat shqiptare ecin në Europë. Kur Kukësi kaloi 3 ture në Europë, u bëmë të gjithë tifozë me ta”, u shpreh ndër të tjera Orges Shehi.