Kukësi në ankth për Shametin, ndaj Partizanit... “treni” i fundit

Kapiteni rrezikon shumë, vetëm fitorja shpëton verilindorët

Nuk kanë të sosur hallet për Kukësin. Sikur të mos mjaftonte humbja fatale në Korçë dhe problemet e shumta që kanë me dëmtimet, një tjetër lojtar i shton ankthin. Ylli Shameti rrezikon që të mungojë gjatë. Pas takimit të së shtunës ndaj korçarëve, ka “alarm” për kapitenin. Lideri i ekipit në minutën e 71-të doli në sulm për të ndihmuar skuadrën dhe pas atij harkimi nga Rroca për pak sa nuk shënoi. E megjithatë, në njëjtin aksion mbrojtësi ka marrë një goditje në këmbën e djathtë. Gazeta “Panorama Sport” mëson se ajo përplasje ka rezultuar e rëndë për shtatlartin. Ai ka pasur dhimbje dhe ënjtje në gjurin e djathtë e nga të dhënat paraprakë dyshohet për zgjatje në rastin më të keq të ligamentit (kolateral medial). Ishte planifikuar që dje ai të bënte rezonancën magnetike, por për shkak të disa burokracive ajo është shtyrë për ditën e sotme. Pas përgjigjes që do të dalë, do të ketë një pasqyrë më të qartë në lidhje me shkallën e dëmtimet dhe kohën e rikuperimit. Por një gjë është e sigurt, lojtari do humbasë sfidën e radhës. Frika është që kapiteni të qëndrojë disa javë jashtë prej këtij dëmtimit. Përveç Shametit për ndeshjen ndaj Partizanit nuk do të jetë dhe Valon Ethemi, i cili ka plotësuar numrin e kartonëve. Lajmi i mirë për Armando Cungun është se do të rikthehen Melo e Rrumbullaku për supersfidën kundër Partizanit. Ndërsa Cuculi do të monitorohet çdo ditë, me shpresën që të jetë gati.

SHANSI I FUNDIT - Kukësi ka zhvilluar një kampionat relativisht të mirë gjatë këtij sezoni, por përtej lojës së mirë dhe rasteve të krijuara në çdo takim, ata kanë pasur të paktën në dy pjesë të kampionatit ulje-ngritjet e tyre. Oshilacionet janë një prej shkaqeve që ata gjenden sot në vendin e dytë me 44 pikë, plot 9 më pak se Partizani i vendit të parë. Verilindorët janë gabuar duke u mundur nga Flamurtari në Vlorë më 26 gusht 1-0, 1-0 në Korçë me 4 nëntor, 0-1 vetëm 4 ditë më vonë ndaj Partizanit, 1-2 në Kamzë ndaj Flamurtarit më 2 nëntor, 0-1 ndaj Tiranës më 10 shkurt të këtij viti, 15 shkurt 2-1 ndaj Teutës në Durrës e 1-0 në Korçë po sërish ndaj Skënderbeut më 16 mars. Gjashtë humbje, ku nënkampionët kanë zhvilluar këtë sezon futbollistik, kanë bërë që ata thuajse të dalin nga lufta për titull. Gjithsesi, presidenti Safet Gjici e mandej gjithë ekipi besojnë se gjithçka do ndryshojë dhe Kukësi do të rihyjë në garë këtë fundjavë, pasi shorti i rezervon përballjen direkte me Partizanin. Fitorja ndaj kryeqytetasve është shansi i fundit për kuksianët, të cilët kërkojnë hakmarrjen dhe medoemos tri pikët për t’iu afruar atyre e për të rihapur garën. Në rast të një rezultati negativ, Kukësi del tërësisht nga gara për titullin kampion.