Duka në krah të trajnerit: Strakoshës t'i bëhet mësim
Presidenti i FSHF-së: Të vinte në orar si shokët
Presidenti i Federatës Shqiptare të Futbollit, Armand Duka, foli për mediat në ditën e parë të grumbullit të ekipit Kombëtar, në prag të 2 sfidave eliminatore të Europianit. Pas prezantimit të sponsorit të ri gjeneral për ekipin Kombëtar, kreu i FSHF-së komentoi zgjedhjen dhe vendimin e trajnerit Panuçi për të lënë jashtë portierin Strakosha pas vonesës për grumbullimin. Duka vlerësoi atmosferën brenda ekipit, si dhe i doli në krah trajnerit duke e konsideruar të drejtë lënien jashtë të portierit të Lacios, nënvizoi kostot për këtë vendim, por në të njëjtën kohë lëshoi edhe një ultimatum për portierin e Lacios. Si është atmosfera në prag të ndeshjeve të para kualifikuese? Atmosfera brenda ekipit është e mirë. Ekipi në këto momente pothuajse është 100% gati. Futbollistët kanë arritur në hotel. Sot (dje) bënë stërvitjen e parë (flet para stërvitjes së mesditës). Brenda nesh çdo gjë po përgatitet mirë. Gjithsesi, atmosferën e një ndeshje kualifikuese kaq të rëndësishme nuk është se po e ndiej. Nuk e di pse. Pse e thoni këtë? Në ambientin në përgjithësi nuk ka shumë interes. Ekipi patjetër që është i rëndësishëm, do mobilizohet maksimalisht. Ndeshja është shumë e rëndësishme, por jemi të rëndësishëm edhe ne që duhet ta mbështesim ekipin. Me njerëz në stadium, me media, sepse kjo është një gjë e rëndësishme që na bën të gjithëve krenarë. T'i fillojmë mbarë eliminatoret e Europianit. Panuçi e nisi aventurën e tij me dënimin e Cikalleshit për një vonesë dhe tani vjen edhe largimi i Strakoshës sërish për vonesë në grumbullim… Më vjen keq për portierin e Kombëtares, Strakosha. Është një nga lojtarët më të rëndësishëm. Një nga më kualitativët të skuadrës, por edhe disiplina është lojtar akoma më i rëndësishëm për skuadrën. Nga kontakti që kam pasur me trajnerin, portieri nuk ka pasur arsye objektive për të munguar. Përderisa gjithë shokët vijnë në orar, duhet të respektosh orarin. Që të mungojë Strakosha në dy ndeshje, është një humbje për skuadrën teknikisht, si dhe një fitore për disiplinën. Gjithashtu, edhe një mësim për lojtarin, që ekipi Kombëtar është mbi gjithçka.