Spaleti i vendos kusht Ikardit
Ish-kapiteni feston fitoren në rrjet, të premten pritet takim me presidentin Zhang
Ditën përpara derbit karikoi skuadrën duke publikuar në rrjet një foto të tijën me fanellën e Interit, bardhezi, ku në sfond dukej “San Siro”. Ndërsa dje ka festuar fitoren, i pikturuar zikaltër, për një sfidë që njeh mirë dhe që shumë herë në të kaluarën e ka vendosur ai: së fundmi, në fazën e parë. Të dielën në mbrëmje, megjithatë ndoqi suksesin interist nga ekrani i televizorit. Tani po jep sinjale afrimi, imazhi në postim është emblematik: “Duomo” (“Katedralja” e Milanos), simbol i qytetit, i mbuluar me ngjyrat e Interit, me shkrimin “Milano është vetëm zikaltër”. Mes “pëlqimeve” spikat ai nga profili zyrtar i klubit, që kishte injoruar postimet e fundit të Mauros. Dhe e pret në fushë, ku mund të japë kontributin.
TAKIM ME ZHANG -
Edhe pse flitet se trajneri Luçiano Spaleti ka caktuar kushtin: mund të rikthehet, por pa shirit dhe jo menjëherë titullar. Për të sqaruar ambientin, ende i tendosur që pasi argjentinasit iu hoq shiriti, në “fushë” do zbresë vetë presidenti Stiven Zhang. Kreu i klubit ka qëndruar i mënjanuar duke i kaluar administratorit të deleguar Xhuzepe Marota çdo vendim strategjik dhe komunikues. Një mbledhje, mes Zhangut, ish-kapitenit dhe avokatit Nikoleti flitet të zhvillohet brenda javës me shumë mundësi, sipas raportimit të mediave italiane, këtë të premte. Pritet që lojtari të shpjegojë këndvështrimin e tij, keqardhjen për heqjen e shiritit dhe qëllimet për të ardhmen: pra, nëse do dëshirojë të luajë apo jo 10 ndeshjet e fundit sezonale.