Politano: Ju tregoj sekretin e derbit
“Ishim të karikuar, Ikardi ka qenë i rëndësishëm...”
Mateo Politano ishte “heroi” i heshtur i derbit të Milanos. Nuk shënoi dot gol për të rrëmbyer skenën siç bënë të tjerët, por fitoi penalltinë vendimtare dhe me inkursionet e tij vuri në vështirësi mbrojtjen e Milanit. Në një intervistë për mediat italiane, sulmuesi flet për Ikardin dhe teksa thotë se është i rëndësishëm, e thumbon duke e quajtur si zëvendësues të Lautaros.
Mateo, si ndiheni pas fitores në derbin e Milanos?
Sigurisht që jam i lumtur për atë fitore. Ishte shumë e rëndësishme për të qëndruar në garën e Ligës së Kampionëve.
Në harkun kohor të dy-tri ditëve ndryshuat në mënyrë të befasishme. Pse mendoni se erdhi ky ndryshim?
Mendoj se ndryshimi lidhet me faktin që të përgatisësh ndeshje të tilla si derbi, është gjithmonë më e lehtë. Ishim të karikuar dhe të motivuar për të bërë një ndeshje të madhe.
Pas asaj ndeshjeje, jeni gati për kombëtaren?
Po. Është gjithmonë bukur të luash me kombëtaren e Italisë dhe ky është objektivi i të gjithë lojtarëve. Unë jap maksimumin gjithmonë aty, ashtu siç bëj edhe me Interin. Unë do të jem në dispozicion të trajnerit dhe i gatshëm të ndihmoj edhe Italinë.
Çfarë diskutuat me njëritjetrin në dhomat e zhveshjes pas fitores me Milanin?
Ishim të emocionuar për fitoren dhe të lumtur. Thamë se ky Inter duhet të jetë gjithmonë kështu, i bashkuar dhe një skuadër kompakte. Duhet të jemi të uritur në çdo ndeshje për të marrë fitoren dhe kështu do t’i hapim punë çdo kundërshtari.
Mund të flasim se tani vendi i tretë për Interin është i sigurt?
Jo. Është ende herët për të folur për këtë gjë. Duhet të luajmë shumë ndeshje dhe ka shumë garë, prandaj them se është e vështirë për të thënë se jemi të sigurt në vendin e tretë.
Si është raporti juaj me Spaletin, duke qenë se nga jashtë flitej për një largim të mundshëm të tijin? Në fushë skuadra dha gjithçka për të.
Nuk e kuptoj nga qarkullojnë këto zëra. Nuk kemi dyshuar kurrë te trajneri dhe kemi qenë gjithmonë pranë tij. Raporti ynë është shumë i mirë.
Na shuani një kuriozitet, a
ju mungon Ikardi?
Normale që na mungon. Është një sulmues i fortë, që ka qenë shumë i rëndësishëm për ne. Tani kemi vetëm Lautaron në sulm dhe duhet që ndonjëherë të zëvendësojë edhe atë. Por, këto gjëra i vendosin drejtuesit me lojtarin, ndërsa ne të tjerët duhet thjesht të zbresim
në fushën e lojës dhe të ndihmojmë skuadrën të marrë pikët.
Po ju e doni në fushë dhe shpresoni të rikthehet sa më shpejt?
Po. Nëse është mirë nga ana fizike, shpresoj që të rikthehet.
Si është klima në dhomat
e zhveshjes së Interit?
Mendoj se e patë dhe e kuptuat të gjithë se si është klima tek Interi. Jemi një ekip i fortë, kompakt dhe grup i bashkuar.
Ka nga ata që thonë se kjo skuadër nuk ka më nevojë për Ikardin. Ju çfarë mendoni?
Nuk e di. Për këtë duhet të
pyesni trajnerin, sepse është ai që e bën formacionin dhe vendos se kush duhet të luajë apo jo.
Po ju lojtarët e keni një mendim?
Ne lojtarët duam thjesht të zbresim në fushë dhe të japim maksimumin, pavarësisht se kush luan apo jo.