Shehu: Distancë domethënëse, Partizani e ka siguruar

Ish-sulmuesi i të kuqve: Ky është viti i duhur për të kthyer titullin, luhatjet nuk ndikojnë

Fitorja 3-0 me Teutën dhe thellimi i distancës me Kukësin e vendit të dytë e ka shtuar entuziazmin e kampin e kuq se realisht ky është viti i duhur që Partizani të kthejë titullin kampion, trofe i cili i mungon në palmaresin e tij që nga viti 1993. Për ish-sulmuesin e të kuqve, që ka fituar edhe trofe me Partizanin, Ylli Shehu, pas fitores me Teutën titulli është thuajse i siguruar. "Them se Partizani e ka siguruar realizimin e objektivit, distanca me rivalin më të afërt është domethënëse. Por, është edhe ndeshja direkte me Kukësin, që do të luhet pas ndërprerjes së ardhur prej angazhimeve të ekipeve kombëtare. Megjithatë, Partizani ka euforinë, ka një trajner e një grup shumë të mirë të bashkuar dhe kanë dalë superiorë në këtë kampionat. Ky është viti i Partizanit, besoj për t'i kthyer atë titull", u shpreh ish-sulmuesi Shehu në emisionin "Rubrika Sportive", ku ishte i ftuar të dielën në darkë në studion e "RTSH SPORT". LUHATJET DHE SITUATA Partizani kryeson me meritë Superioren, ku pas 25 javësh ka 53 pikë, nëntë më shumë se Kukësi i vendit të dytë. Përpos kryesimit, luhatjet nuk kanë munguar te "demat". Por, për ishsulmuesin dhe trajnerin e të kuqve, këto oshilacione të skuadrës, kryesisht në javët e fundit, nuk do të ndikojnë në arritjen e objektivit kryesor. "Do vinte një ditë që Partizani të humbte, nuk do të fitonte përherë. Ky është një grup i mirë në këtë kampionat, nuk ka lënë të tjerët të shfaqin vlerat e tyre, pavarësisht blerjeve që janë folur se kanë forcuar rivalët. Shihet që Partizani nuk është ekip që mposhtet lehtë dhe kjo e bëri të jetë 9 pikë para ndjekësit më të afërt", u shpreh ish-sulmuesi kampion me fanellën e Partizanit, Ylli Shehu.