Lautaro dhe Aguero gol, kualifikohet Argjentina
Mesin me shokë tani e pret Venezuela në çerekfinalet e kompeticionit
Me shumë frikë, sërish me mjaft raste të shpërdoruara, por mbi të gjitha me një lojë që përsëri nuk bind, Argjentina gjithsesi arrin të kualifikohet për në çerekfinalet e Kupës së Amerikës. Përballë një Katari modest, kombëtarja e Lionel Skalonit fiton me rezultatin 2-0 dhe në raundin e ardhshëm do të gjejnë përballë Venezuelën, pas së cilës (gjithmonë në rast se e kalojnë) mund të vijë dueli madhështor kundër Brazilit vendës. Por deri atëherë, duhet ende kohë, por mbi të gjitha duhen shumë gjëra për t'u kolauduar, në një skuadër, e cila pavarësisht emrave të mëdhenj, nuk ka atë balancën që nevojitet për të vendosur veten si një mes favoriteve të këtij turneu. Dhe me Katarin, më shumë sesa për meritë të Argjentinës, suksesi erdhi si rrjedhojë e modestisë së lojës së aziatikëve, ashtu sikurse edhe për dhuratat që ato u bënë lojtarëve bardhekaltër.
NDESHJA - Ndryshe nga çfarë ishte menduar, Argjentina e nis sërish me trion Lautaro-Aguero-Mesi, ndërsa Dibala që ishte përfolur se do të kishte rastin të luante titullar, ishte i akomoduar sërish në stol. Gjithsesi, kjo zgjedhje mund të quhet e duhur, sepse ndoshta në minutën e katërt, fati donte që të ishte Lautaro Martinez në hyrje të zonës, në një pasim totalisht të gabuar nga ana e Pedros, që kërkoi të ndryshonte lojën, por sulmuesi i Interit fillimisht stopon saktë dhe në hyrje të 16 metrave godet saktë në rrjetë. Për "Demin" e sulmit argjentinas kjo ishte një "hakmarrje" kundrejt fatit të
keq që e kishte shoqëruar në dy ndeshjet e para të Kupës së Amerikës, por këtë herë shkoi mirë, pas vetëm 4 minutash lojë. Po Mesi? Leo dallohet qartë, se pavarësisht penalltisë ndaj Uruguait, ai ka një dëshirë të çmendur për t'u zhbllokuar me aksion, por dje
ndaj Katarit, ndoshta ishte ai që e teproi me driblimet dhe tentativat për të shkuar me topin në këmbë, i vetëm drejt portës rivale. Në pjesën e dytë, ishte sërish Argjentina që kontrolloi, por gabimet përpara portës janë të shumta, tentativat nga distanca nuk e
trembin Katarin, por edhe loja korale, e saktë dhe e shpejtë mungon. Gjithsesi, Skaloni bën lëvizjen e duhur në të 76ën duke hedhur në fushë Dibalën për Lautaron dhe gjashtë minuta më vonë, ishte pikërisht sulmuesi i Juves që rikuperon një top në mesfushë, "vallëzon" mes tre mbrojtësve dhe pason për Agueron, me sulmuesin e Sitit që djeg në shpejtësi dy mbrojtës rivalë dhe lëshon një të djathtë të saktë në portë. 2-0 dhe Argjentina mund të nisë të mendojë për sfidën e së premtes, me Venezuelën.