Nejmar do vetëm Barçën, ul pagën me 14 milionë €
Është gati të ulë pagën nga 36 në 22 milionë euro, Barça duhet të bindë PSG-në
Nejmar është gati për t’u rikthyer te Barcelona dhe do të bëjë gjithçka për të luajtur sërish përkrah Lionel Mesit. Mendon se skuadra katalanase është e vetmja që mund ta ndihmojë në këto momente të vështira të karrierës. Ai ka ndërmend të ulë pretendimet ekonomike dhe rrogën vjetore për t’u rikthyer sërish te Barcelona. “Mundo Deportivo” shkruan se sulmuesi brazilian i PSG-së është gati të heqë dorë nga 14 milionë euro. Kjo do të thotë se te Barcelona do të ketë pagë vjetore 22 milionë euro në vit, ndërsa te PSG-ja paguhej 36 milionë euro. Një sakrificë, të cilën e bën për të gjetur qetësinë dhe stimujt e duhur në aspektin sportiv. Madje do të “sakrifikonte” kaq shumë miliona euro vetëm që të argëtohej sërish në futboll dhe të linte pas problemet e shumta me shokët e skuadrës së Mbape dhe Kavani. Shkëndija e dashurisë mes tij dhe PSG-së nuk lindi kurrë për arsye nga më të ndryshmet, ku edhe dëmtimet e shumta patën ndikimin e tyre.
Po vij- Pavarësisht vështirësive të shumta që do të ketë ky transferim, Nejmar është i bindur se këtë sezon do të veshë fanellën e Barcelonës. Gazeta katalanase “Sport”, raporton se ai u ka shkruar një mesazh shokëve të tij në “Whatsapp” dhe u ka thënë se do të shkojë. “Rrini të qetë. Unë do të vij”, ishte mesazhi i tij për futbollistët e Barcelonës. Kjo është dëshira e madhe e tij, por në të vërtetë duhet të gjendet gjuha e përbashkët mes dy klubeve. PSG-ja kërkon 300 milionë euro për Nejmarin dhe nuk
ka ndërmend që të zbresë poshtë kësaj shifre, ndërsa Barça nuk ka ndërmend të ofrojë më shumë se 200, ose më saktë: 100 milionë dhe Kutinjon. Megjithatë, me hapjen zyrtare të merkatos, do të ketë zhvillime dhe palët do të bisedojnë për të arritur
një marrëveshje. Dëshira e lojtarit është shumë e rëndësishme në këtë aspekt dhe do të ndikojë për rikthimin e Nejmarit te Barcelona. Duket se ai është i gatshëm t’i plotësojë të gjitha kushtet që katalanasit i kanë vënë për ta rikthyer në skuadër.