Sherri, dëshira e vjetër e bardhebluve për portën
Alen Sherri, një ide bardheblu. Po, është më se e vërtetë. Për momentin, bardheblutë po shohin në treg për portier. Kanë testuar dhe vëzhguar disa nga "gardianët" e Kategorisë së Parë dhe Superiore dhe sytë kanë mbetur tek Alen Sherri. Një lojtar shumë i fortë dhe me të ardhme të madhe. Ai ka luajtur 1870 minuta në Kategorinë e Parë gjatë 21 ndeshjeve me Vllazninë. Ekspertit të portierëve te Tirana, Emanuel Egbosë, i ka pëlqyer ky gardian kur bardheblutë luanin kundër Vllaznisë sezonet e kaluara dhe klubi kryeqytetas pritet të nisë ofensivën për këtë futbollist, që Tirana ta bëjë shumë shpejt të vetin. Pritet të ketë lëvizje edhe këtë sezon, sepse ai mund të jetë portieri i së ardhmes te bardheblutë. Alen Sherri është një emër për të cilin flitet prej kohësh. Të gjithë ata që e kanë parë të stërvitet dhe të luajë, thonë se është talent i madh. Portier, 21 vjeç, thuajse 2 metra i gjatë, prej 6 vitesh pjesë e ekipit të parë të Vllaznisë, që në sezonin 20142015 dhe 2015-2016 ka luajtur edhe 10 ndeshje si titullar në Superiore, tani është i padiskutueshëm në portën e Vllaznisë. E kërkuan klube të huaja, u provua edhe te Roma, i vëzhguar dhe i pëlqyer nga një mjeshtër si Valter Sabatini, por nuk u bë asgjë për çështje dokumentacioni dhe financiare. Madje, u fol edhe për një kalim në Itali, te Savona, por nuk qe e thënë. Tani Sherri është titullar i padiskutueshëm, ka luajtur pothuajse të gjitha ndeshjet dhe prej kohësh ka rënë në sytë e bardhebluve, që e kanë piketuar si pasardhësin e Ilion Likës te skuadra bardheblu.