Melo: S'e kemi frikë Karabakun

Në një prononcim për mediat azere, 24-vjeçari ka pohuar se "demat" besojnë te suksesi

Uilliam Kardozo Melo është për forcimi i parë i Partizanit në merkaton e verës dhe pas hedhjes së shortit për Champions-in, brazilianit i bie që pas një viti të luajë sërish ndaj Karabakut. Një vit më parë Melo ishte pjesë e Kukësit ku kampionët e Azerbajxhanit i eliminuan pas barazimit 0-0 në Shkodër dhe fitores 3-0 në Baku. 24-vjeçari ka dhënë një intervistë për "azerisport.com", ku ka pohuar se Partizani e respekton Karabakun, por nuk e kanë frikë. Sipas Melos, të kuqtë po përgatiten për të dhuruar futboll të bukur dhe për të marrë rezultatin e duhur.

Braziliani u ka deklaruar azerëve se në kampin e kuq e njohin kundërshtarin dhe shpreson që humbjen që pësoi me Kukësin një vit më parë, ta kompensojë këtë radhë me një sukses si pjesë e Partizanit.

Riktheheni sërish me klubin tuaj në Karabak...

Po, sipas mendimit tim, ky është një short i mirë. Jam i lumtur që do të luaj përsëri kundër Karabakut.

A mendoni se klubi juaj ishte me fat nga shorti apo prisnit më shumë? Nuk i zgjedhim ne kundërshtarët. Duhet të luash me atë që të vë shorti. Pra, do të luajmë ndaj Karabakut.

Vitin e kaluar erdhët në Baku si pjesë e një klubi tjetër shqiptar, Kukësit. Sigurisht, ti di më shumë se të gjithë të tjerët te Partizani rreth Karabakut...

Ne e njohim mirë kundërshtarin, ky është një ekip shumë i mirë. Mbaj mend atë ndeshje në të cilën kemi humbur. Unë shpresoj që këtë herë Partizani do ta mundë Karabakun.

A mendoni se skuadra juaj do ta kalojë Karabakun?

Ne jemi duke u përgatitur për këtë. Ne duam të tregojmë një futboll të mirë në të dyja ndeshjet dhe të shkojmë në turin tjetër.

Sipas mendimit tuaj, a ka Partizani ndonjë avantazh ndaj kundërshtarit?

Jo, nuk dua të flas se cili klub është favorit në këtë përballje. Ne thjesht duam dhe besojmë se do të tregojmë një lojë të mirë kundër Karabakut.

Ndeshja e parë luhet në Tiranë. A është ky një motivim për ju?

Sigurisht që është mirë. Ne do të luajmë para tifozëve tanë dhe do të provojmë që të fitojmë.

A keni frikë nga një rival që ka përvojë në Champions dhe Ligën e Europës?

Ne e respektojmë Karabakun, por nuk kemi frikë. Ne e dimë forcën tonë dhe shpresojmë për më të mirën.