Kallaku premton besnikëri: Teutën e kam në zemër, respektoj kontratën
Mesfushori i bashkohet sot skuadrës në kampingun në Bullgari
Mesfushori i Teutës dhe njëkohësisht kapiteni i Kombëtares U-21, Sherif Kallaku, konfirmoi edhe një herë se do të respektojë kontratën me klubin durrsak. Në intervistën e dhënë për "Panorama Sport", mesfushori ka pohuar se është totalisht i fokusuar te përgatitjet për dy ndeshjet në Ligën e Europës me letonezët e Ventspils.
Sherif, si është gjendja juaj pas operacionit të kryer?
Gjendja është e mirë, pasi operacioni ishte i lehtë për lirimin e sinuseve në anën e majtë të hundës. Tani ndihem mirë dhe jam gati t'i bashkohem ekipit në Bullgari.
Është përfolur ditët e fundit për një kalim të mundshëm te Partizani. Si qëndron e vërteta?
Unë kam kontratë me Teutën dhe për sezonin e ri, të cilën do ta respektoj deri në fund. Gjërat e tjera i di klubi dhe presidenti Hasanbelliu. Ndaj, nuk është se më tërheq ideja për t'u larguar nga Teuta, por dua të jap më të mirën për këtë ekip, duke filluar nga pjesëmarrja në Ligën e Europës.
Kur priteni të bashkoheni me Teutën në Bullgari?
Këtë javë jam stërvitur në Durrës për të mos humbur formën time dhe nga fillimi i javës do të jem pjesë e ekipit në Bansko, ku do të vijoj përgatitjet me grupin për dy ndeshjet ndaj Ventspils.
A jeni të kënaqur me atë qe keni bërë në sezonin e fundit në Durrës?
Unë nuk jam i kënaqur asnjëherë me veten. Besoj se duke punuar shumë, një ditë do të kënaqem, por vetëm me punë dhe regjim, do arrihet gjithçka. Shpresoj dhe besoj që sezonin e ri të jem akoma edhe më mirë, pasi po stërvitem shumë.
sezonin e ri, do të vijoni te Teuta?
Do më shikoni te Teuta, ekipi im i zemrës, skuadra që më ka dhuruar shumë kënaqësi dhe emocione. Unë e ndiej veten durrsak dhe do bëj ç'është e mundur për Teutën dhe sportdashësit durrsakë.