Vuajti mbipeshën, Thaçi: Këtë vit po marr masa
“Boll me premtime boshe, rikthimi në elitë është detyrim”
Kur erdhi te Besa, Bler Thaçin nisën ta etiketojnë si pasardhësin e Bernard Berishës. Kishte cilësi dhe teknikë, e megjithatë hovin e tij e ndali një dëmtim i rëndë që mori në të dytin sezon. E megjithatë, mesfushori nuk dorëzohet. Ai është i bindur se ky vit do të sjellë shpërthimin e tij me fanellën verdhezi. Gjatë një deklarate të dhënë për “Panorama Sport”, mesfushori shpjegon se bashkë me kosovarët e tjerë (Shaljani, Krasniqi e Zeqiri) ndodhen në vendlindje dhe në pritje të startit të sezonit të ri. “Pavarësisht se sezoni ka mbaruar para 2 muajsh, ne nuk po pushojmë. Po stërvitemi individualisht, pasi duam që të jemi në top-formë për nisjen e kampionatit. Vjet për shkak të një dëmtimi fitova disa kile dhe isha mbipeshë, gjë që dha efektet e veta përgjatë kampionatit. Që të mos ndodhë përsëri kjo, këtë periudhë nuk po u ndahem vrapimeve, ushtrimeve çdo ditë, në mëngjes e në mbrëmje. Të njëjtën gjë po bëjnë edhe Krasniqi, Shaljani e Zeqiri. Stërvitemi, që kur të nisë faza përgatitore të na gjejë në gjendje sa më të mirë”, thotë Thaçi, që me padurim pret t’i bashkohet ekipit.
OBJEKTIVI - Mesfushori beson te ngjitja, megjithatë ka një këshillë për ekipin dhe jo vetëm. Ai thekson se ka ikur koha e premtimeve dhe deklaratave boshe, pasi tashmë
është kthyer në detyrim ngjitja në elitë. Kosovari mendon se do të ishte realisht turp nëse edhe për një tjetër sezon, nuk do të realizohej misioni madhor. “Është e vërtetë që mjaftoi një ndeshje e Besa sërish mbeti jashtë Superiores. Kjo nuk e justifikon aspak dështimin tonë, pasi kurrsesi s’duhet t’i kishim lënë fatet e sezonit në dorë të vetëm një ndeshjeje. Flas shpesh me presidentin Bizhdili e trajnerin Magani dhe jam në koherent të çdo lëvizjeje te Besa. Personalisht, mezi po pres t’i bashkohem ekipit me bindjen se premtimet nuk na lejohen më dhe se tifozët duan vetëm veprat tona. Nuk duhet të premtojmë Superioren sikurse bëmë këto 4 vite, por të djersijmë fort që këtë objektiv ta shijojmë e ta prekin tifozët javë pas jave. Pas 5 vitesh në Kategorinë e Parë do të ishte vërtet turp nëse sezoni në prag nuk do të ishte i gjithi i yni që nga java e parë. Nga bisedat me presidentin kam mësuar se kushtet e stërvitjes dhe fushës do rregullohen, ndaj them me bindje se me tërë këto kushte, ku fus dhe akomodimin si turist, është e pafalshme, madje faj nëse do ta çojmë ndërmend dështimin”, përfundoi 19-vjeçari.