Luis Hamilton pa rivalë, fiton lehtësisht në Francë
Botas e Lëklerk plotësojnë podiumin, Ferrari dobët
Luis Hamilton fitoi dje Çmimin e Madh të Francës dhe regjistroi suksesin e gjashtë në Botërorin e këtij sezoni në Formula 1. Britaniku i Mercedes dominoi plotësisht në pistën "Pol Rikard" dhe arriti për herë të katërt radhazi të ngjitet në shkallën më të lartë të podiumit, në një garë që praktikisht nuk dhuroi emocione. Vendi i dytë shkoi për Valteri Botas, i cili nuk mundi dot të rivalizonte me shokun e skuadrës dhe e kaloi finishin +18.1 sekonda, më vonë se kampioni në fuqi. Në podium u ngjit gjithashtu edhe Sharl Lëklerk, ku piloti i Ferrarit ishte disa të dhjetat më i ngadaltë se Botas. Ndërkohë, Sebastian Fetel nuk mundi të shkonte më shumë se vendi i pestë, duke përfunduar pas shpatullave të holandezit Maks Vershtapen. Kështu edhe një herë tjetër gara rezulton një lojë fëmijësh për britanikun Hamilton, i cili starton pa rrezikuar asgjë dhe e mban qetësisht pas vetes kolegun Botas, ku ky i fundit nuk arrin të shfaqet agresiv. Në Francë mungoi spektakli dhe skuadra Mercedes korri dopietën e saj të gjashtë në këtë sezon
dhe triumfin e tetë në po kaq gara të zhvilluara. Hamilton përsëri tregon një nivel superior, duke e likuiduar për herë të katërt radhazi kolegun e ekipit dhe tashmë e shikon veten të shkëputur plot 36 pikë në renditje nga finlandezi. Ndërkohë shpresat në skuadrën gjermane
për të thyer rekordin e 11 fitoreve radhazi gjatë startit të sezonit janë shumë të mëdha. Ky rekord aktualisht vazhdon t'i përkasë skuadrës MekLaren, e cila në vitin 1988 mori 11 suksese me pilotët Sena dhe Prost. Për sa i përket Ferrarit, vazhdon ecuria aspak pozitive, ku makina
SF90 nuk u shfaq për asnjë moment në lartësinë e duhur për të konkurruar me rivalët. Megjithatë, Lëklerk u tregua i zoti, duke mbajtur pas vetes në start, një Vershtapen agresiv. Më pas e mbrojti më së miri vendin e tretë, e në fund me një xhiro fantastike, rrezikoi që të
rrëmbente edhe vendin e dytë, pasi Botas kishte probleme me gomat. Ndërsa Fetel pas provave katastrofike ku u rendit i shtati, arriti të përfundojë garën në vendin e pestë, ku në fund ia doli të dhurojë edhe xhiron më të shpejtë me gomat soft dhe mori 1 pikë shtesë. Sigurisht
që kjo nuk ishte përgjigjja dhe reagimi që pritej nga ishkampioni i botës pas zhgënjimit që pati në Montreal. Numrat e këtij sezoni tashmë janë alarmantë dhe një tregues i qartë për pilotin e "kokëkuqes", që e shikon veten plot 76 pikë larg nga kreu i tabelës.