“Kisha frikë nga Katari, tani nis një tjetër Kupë”
“Duhet të përmirësohemi akoma më shumë për Venezuelën”
Lionel Mesi nuk e fsheh faktin që ndaj Katarit kishte shumë frikë se mos prekte pikën më të ulët me kombëtaren e Argjentinës, por tregon se tani duhet të përmirësohen. Në një reagim për gazetën “MARCA” pas fitores ndaj Katarit, kapiteni i bardhekaltërve thotë se tani nis një tjetër Kupë Amerike, ku gabimet nuk lejohen dhe vetëm kështu mund të zgjasin rrugëtimin e tyre. “Pleshti” foli edhe për golin e shpejtë të Lautaros dhe për aktivizimin e dy sulmuesve të tjerë që nga minuta e parë. E pranon se ata ndihmojnë skuadrën për të krijuar raste të rrezikshme.
KLASIFIKIMI- “Jam i lumtur për klasifikimin. Janë ndeshje shumë të vështira, sidomos kur luan me frikën që mund të eliminohesh. E rëndësishme është që fituam”.
FUSHAT- “Janë terrene shumë të këqija. Është e vështirë të luash në këto kushte dhe sa herë që dua të ndaloj topin, ai kërcen përpara këmbëve të mia”.
PËRMIRËSIM- “Sigurisht që duhet të përmirësohemi në pjesën e mbetur të këtij kompeticioni.
Na duhej një fitore e tillë për të gjetur besimin e humbur. Tani nuk mund të bëjmë gabime të tjera. Fillon një tjetër Kupë... Dëshira jonë është të shkojmë deri në fund, por nuk do të jetë e lehtë. Skuadrat janë shumë të forta dhe e kanë treguar këtë në fazën e grupeve. Tani që vijnë çerekfinalet do të jenë më të përgatitura”.
GOLI- “Ishte shumë i rëndësishëm goli i Lautaros në minutat e para. Ne tentuam ta gjenim rrugën e rrjetës që nga fillimi dhe ky presion na ndihmoi për të shënuar. Pastaj frika ishte që mos pësonim gol, por në pjesën e dytë ishim më të qetë, menaxhuam situatën”.
DY SULMUES- “Është gjithmonë mirë kur ke sulmues të tjerë afër dhe krijon raste për të shënuar. Kur ke një kundërshtar që luan mirë, duhen disa lojtarë në repartin e avancuar”.
VENEZUELA- “Duhet të përmirësohemi shumë kundër Venezuelës. Janë një ekip me objektiva të qarta dhe që luajnë në gjysmëfushë, si në sulm ashtu edhe në mbrojtje”.