Luftëtari bind ish-sulmuesin e Olimpiakosit, jehonë në Greqi
Majkëll Olaitan është prurja e parë e Luftëtarit për sezonin e ardhshëm. “Panorama Sport”, dy ditë më parë, bëri të ditur emrin e 26-vjeçarit nigerian si përforcimin e parë të merkatos së verës. Madje, nuk kanë munguar dhe lajmet që vijnë nga mediat greke, të cilat ish-sulmuesin e Olimpiakosit e shohin lojtar të bluzinjve. Një goditje e beftë dhe për më tepër cilësore, thuhet në mediat greke nga ana e klubit të Luftëtarit. Do të mjaftonin 25 performancat e sulmuesit nigerian, Majkëll Olaitan, dhe 11 rrjetat e tundura me fanellën e Olimpiakosit, që shtypi
sportiv grek t’i bëntë jehonë afrimit të parë të bluzinjve. Me qëllim zgjidhjen sa më shpejt të temës më të nxehtë, asaj të trajnerit, burime konfidenciale bëjnë me dije se drejtuesit e Luftëtarit kanë udhëtuar drejt Greqisë për të vendosur ndoshta përfundimisht pikat mbi “i”.
ERALDO HYSENI
- Luftëtari i sezonit të mbyllur një muaj më parë të bën skeptik për të pasur në sezonin e ardhshëm skuadrën e ëndrrave, premtuar dy javë më parë nga presidenti Grigor Tavo. Parë në këtë këndvështrim, ku boshti i skuadrës së sezoneve të fundit humbi
cilësinë e “ingranazheve”, që funksionuan thuajse në perfeksion, drejtuesit e Luftëtarit janë të prirur për “rikompozimin” dinjitoz të skuadrës. Rikonfirmimi i lojtarëve të perspektivës, pjesë e Luftëtarit, sezonin e mbyllur një muaj parë, mbetet projekt për t’u realizuar vit pas viti si “burim të ardhurash”. Pjesë e gjirokastritëve, mesfushori beratas, Erald Hyseni, është një nga të rinjtë e perspektivës që ofron besnikëri për të ardhmen. I kontaktuar nga “Panorama Sport”, 19-vjeçari Hyseni lidhur me përvojën sezonale te Luftëtari dhe për të ardhmen, u
shpreh: “Në rrafshin personal besoj se duhet të bëja më mirë dhe më shumë. Pavarësisht minutave që kam marrë në edicionin e fundit, besoj se kam fituar më shumë siguri dhe besim në vetvete. Me Luftëtarin kam nënshkruar për katër sezone. Sezoni që lamë pas ishte sezon sakrifice e djerse. Fundi mund dhe duhet të ishte më i lumtur. Siguruam mbijetesën dhe duhet të bëjmë më shumë të gjithë bashkë, pavarësisht se një pjesë e lojtarëve që luajta nuk janë në organikën e skuadrës së ardhshme. Jam pjesë e Luftëtarit për tri sezone të ardhshme. Pse të mos e shoh në të ardhmen e afërt veten time në një tjetër skuadër?! Më parë më duhet të afirmohem dhe të përligj fanellën e Luftëtarit”, tha Hyseni.