Mihaj prezantohet si yll te PAOK, elozhe nga Kaçe
Prapaskena për zgjedhjen, refuzoi Olimpiakosin për Champions-in
Nuk ka më asnjë dy shim. Qendërm brojtësi i Kombëtares do të jetë pjesë e kampionëve të Greqisë deri më qershor 2023. Enea Mihaj është prezantuar dje si pjesëtari më i ri i skuadrës së PAOK-ut, e cila ka përzgjedhur mënyrën më spektakolare për ta bërë publik afrimin më të ri. Me një video në faqen zyrtare, kampionët e Greqisë kanë prezantuar shqiptarin si "e ardhmja". Mesfushori që është pjesë e PAOK-ut, Ergys Kaçe, i ka thurur elozhe. Jo vetëm kaq, por mediat greke kanë zbuluar edhe prapaskenat e vendimit të qendërmbrojtësit kuqezi.
PREZANTIMI
Një video që nga mesazhi i parë i zgjimit për ta ftuar që të bëhet pjesë e skuadrës kampione. Kjo ka qenë mënyra origjinale që PAOK ka preferuar ta prezantojë zyrtarisht transferimin e mbrojtësit të Kombëtares shqiptare nga ekipi i Panetolikosit. Më tej, pjesë e prezantimit ka qenë vizita në zyrat e klubit dhe foto zyrtare me fanellën e klubit, që u shpall kampion në edicionin e fundit. Si mbishkrim në video ishte përzgjedhur fraza: E ardhmja është e jona. Në sezonin që lamë pas, ai luajti 19 ndeshje duke qenë një nga shtyllat e ekipit. Mihaj do të mbajë veshur fanellën me numrin 6 dhe ka nënshkruar një kontratë katërvjeçare, deri në qershor 2023.
PRAPASKENA
Pavarësisht se prezantimi u bë vetëm gjatë ditës së djeshme, Mihaj dhe PAOK kishin gjetur akordin prej ditësh për këtë transferim. Ndërkohë, në median greke "Live Sport", janë publikuar prapaskenat dhe ofertat që kishte në dorë Mihaj para se të binte dakord me PAOKun. Raportohet se Benfika dhe Olimipiakosi kishin shfaqur interes për lojtarin, por që nuk e bindën atë. Në fakt, ishte vetë PAOK që plotësoi të gjithë kërkesat dhe e bindi qendërmbrojtësin të bashkohej me kampionët. 21-vjeçari zgjodhi skuadrën e Selanikut, së pari sepse ajo ka si synim kampionatin dhe kupën edhe për sezonin që vjen. Së dyti, pjesëmarrja në kualifikueset e Ligës së Kampionëve ishte një tundim më shumë. Së treti, do të ketë si shok në repartin e mbrojtjes tre lojtarët më të mirë të kampionatit grek, nga të cilët mund të mësojë: Krespo, Varela dhe Ingnason.
ELOZHET
Ergys Kaçe, ende nën kontratë me PAOK, e ka prezantuar Mihajn si një transferim të rëndësishëm. "Ka cilësi dhe nuk do t'i duhet shumë kohë që të tregojë se çfarë është i aftë të bëjë. E kam shok dhe jam shumë i lumtur që do të jetë pjesë e ekipit. Ishim bashkë në Kombëtare dhe biseduam pak për mundësinë e transferimit të tij te PAOK, por nuk më tregoi më shumë detaje", është shprehur Kaçe.