Shqipëria shkatërron Greqinë për 87 minuta
Formacioni i Arben Sakos vë në "vitrinë" Bakirin dhe Çelën
Shqipëria U-20 në volejboll për mesh kuj vazhdon të dhurojë spektakël në Kampionatin Ballkanik U-20, që po zhvillohet në Tiranë. Pasi dominoi ndaj Kosovës në takimin e parë në Grupin A, ku triumfoi pastër 3-0, dje, përfaqësuesja e drejtuar nga trajneri Arben Sako shkatërroi edhe Greqinë me të njëjtin rezultat, 3-0. Takimi i luajtur dje në sallën sportive "Feti Borova" dhuroi spektakël dhe shumë emocione për qindra të pranishmit që e ndoqën nga afër këtë ndeshje. Ata që i dhanë edhe më shumë bukuri kësaj sfide, ishin grupimi i "Tifozëve Kuqezi", të cilët nuk reshtën për asnjë moment së përkrahuri kombëtaren tonë, duke qenë edhe lojtari i shtatë në fushë. Për sa i përket ndeshjes, ajo fillon me shumë rivalitet, ku të dyja ekipet luftojnë dhëmb për dhëmb në çdo pikë. Për të përcaktuar fituesin e setit të parë do të nevojiten pikët shtesë, aty ku të rinjtë kuqezi tregohen më të saktë dhe fitojnë 26-24. Edhe seti i dytë luhet me ritëm të lartë dhe rezulton tepër spektakolare, ashtu sikurse ai paraardhës, por edhe këtë herë Shqipëria nuk fal dhe i ndëshkon sërish grekët me të njëjtin rezultat, 26-24. Seti i tretë nuk ka shumë histori, pasi Shqipëria dominon në çdo aspekt ndaj helenëve dhe i shpartallon me rezultatin 25-16. Kështu, pas një takimi që zgjati 87 minuta, kombëtarja jonë
siguron një fitore me shumë vlera, që i afron edhe më shumë me zonën e medaljeve. Djemtë e drejtuar nga Arben Sako tregohen thjesht fantastikë, duke zhvilluar një lojë të shkëlqyer si në mbrojtje, ashtu edhe në sulm. Bakiri dhe Çela, dy lojtarët e Partizanit, pasi ishin
vendimtarë në fitimin e titullit për skuadrën kryeqytetase, bëjnë diferencën edhe në kombëtaren U-20. Veçanërisht kapiteni Bakiri, i cili ishte i papërmbajtshëm, me pikë të realizuara në të gjitha format, si nga shërbimi, blloku apo me goditje të fuqishme.