Lautaro sinjale Kontes, Interi gati edhe për tre... pyka
Argjentina vijon të vuajë, por fiton dhe ndaj Katarit siguroi çerekfinalet e Copa Americas. Kur të gjithë presin nga Mesi, ylli i vërtetë po rezulton Lautaro Martinez. Fitoi penalltinë që solli një pikë ndaj Paraguait, ndërsa të dielën iu dha fitoren të tijve. Në kombëtaren argjentinase, është goleadori i periudhës postBotëror, me pesë gola në shtatë paraqitje, shifër që merr përmasa edhe më të mëdha kur krahasohet me vetëm tri realizimet e Mesit.. Përveç tifozëve, edhe mediat po e ngre në qiellin bomberin e Interit, i cili te zikaltrit diti të mbajë edhe peshën e mungesës së Ikardit. Ndaj Katarit ai luajti titullar në krah të Agueros dhe Mesit, me këtë të fundit që nuk e fsheh faktin se ndihet komod me 21vjeçarin si partner sulmi. Fakti që Argjentina tregoi cilësi me futjen e mëpasme të Dibalës nuk ia ul meritat sulmuesit të Interit, i cili, përveç ftohtësisë përpara porte, po tregon edhe karakteristika prej lideri.
SKEMA – Tek Argjentina, edhe pse luhet me tre sulmues, Mesi ka detyrën që të furnizojë partnerët. Me dikë si “Pleshti” puna mund të jetë më e lehtë, por mbetet fakt që krah numrit 10, Lautaro shënon dhe ekzalton. Së bashku me Agueron, ndaj Katarit shënuan nga një gol secili, duke gabuar të paktën po aq raste të pastra. Kërkesa për të pasur një ekip sa më ofensiv, mësohet se ka ardhur nga vetë Leo Mesi, që duke parë përshtatjen me yllin e Interit, nuk është çudi që të ketë sugjeruar edhe pozicionet në sulmin argjentinas. Edhe vetë tekniku e pranoi kënaqësinë e paraqitjes së sulmuesve të tij, duke deklaruar pas ndeshjes me Katarin: “Lautaro dhe
Aguero bënë një punë të paqme dhe të gjithë i pamë frytet”. Duket si një sinjal se tredhëmbëshi do të vijojë edhe ndaj Venezuelës, ndaj nuk është për t’u përjashtuar fakti që edhe Konte të përdorë modelin argjentinas tek Interi, ku Lautaro mund ta gjejë veten me Lukakun dhe Xhekon në krahë.