Kutinjo: Mesi unik, por do ta eliminoj nga Kupa
“Tek Interi ishte moment delikat, por mësova në Itali”
Me Nejmarin e dëm tuar dhe të larguar nga kombëtarja e Brazilit, Filipe Kutinjo është bërë lideri i ri i “Seleçaos”. Deri tani ka bërë ndeshje mjaft të mira dhe ka udhëhequr formacionin e Tites drejt fazës çerekfinale. Në një intervistë për mediat vendëse, ai tregon objektivin për ta fituar Kupën e Amerikës.
URIMI PËR MESIN- “I dërgova një mesazh në grupin e ‘Whatsapp’-it të skuadrës së Barcelonës. Është një nder dhe kënaqësi e madhe të luash përkrah Mesit. Brenda dhe jashtë fushës së lojës është një person i jashtëzakonshëm. Më ka ndihmuar shumë dhe është njeri pozitiv”.
NEJMAR- “Të luash përkrah lojtarëve të mëdhenj dhe të rëndësishëm është gjithmonë mirë. Por nuk duhet të flas shumë për këtë çështje sepse nuk e di fare se çfarë do të ndodhë”.
FUSHA- “‘Arena Korinthias’ është një nga terrenet më të mira ku kemi luajtur. Duhen edhe disa ditë nga ndeshja dhe mendoj se do të përmirësohet akoma më shumë terreni”.
TITULLARËT- “Të gjithë jemi të përgatitur dhe po stërvitemi shumë për të qenë titullarë. Duhet të jemi të përqendruar dhe të kërkojmë të përmirësohemi në çdo ndeshje”.
LIDER- “Në kombëtare, përgjegjësia është gjithmonë më e madhe dhe mendon të japësh gjithmonë më shumë. Futbolli është lojë kolektive dhe duke nisur nga këtu, duhet të punojmë më shumë për të luajtur mirë”.
GRUPI- “Në grupin e ‘Whatsapp’-it të Barcelonës jemi vetëm ne lojtarët që bëjmë pjesë aktualisht. Nuk është Nejmar pjesëmarrës në këtë grup”.
EVERTON- “Është shumë i përgatitur, ka kualitet, luan mirë në mënyrë individuale, kërkon të shënojë dhe krijon intensitet në lojë. Sigurisht që mund të luajë në çdo skuadër në Europë”.
ARTUR- “Është një kampion i vërtetë dhe me kualitet të jashtëzakonshëm. Ka bërë një sezon të shkëlqyer dhe shpresojmë që bashkë të arrijmë gjëra të mëdha në Kombëtare. Duam Kupën e Amerikës, pavarësisht se në gjysmëfinale mund të luajmë ndaj Argjentinës”.
INTERI- “Ndodhi gjithçka shumë shpejt dhe në një moment të shkurtër ndodhën disa gjëra. Kam kaluar momente të vështira, por gjithmonë jam ringritur. Kur shkova tek Interi isha shumë i ri dhe u përballa me një kulturë ndryshe. Por në Itali kam mësuar shumë”.