UEFA përgatit vendimin, gati përjashtimi i Sitit
Thyerja e "Fair Play-t Financiar", Pep rrezikon Champions-in
Afrohen afatet e ven dimit të UEFA-s për çështjen e dënimit të Mançester Sitit për shkeljen e "Fair Play-t Financiar". Me vendimin që pritet të jepet së shpejti, i cili me shumë mundësi do të jetë një përjashtim për një sezon nga kompeticionet europiane për kampionët e Anglisë, "DailyMail" ka bërë një speciale, në të cilën analizon se nuk do të jetë vetëm skuadra e Guardiolës ajo që do të preket nga beteja e fundit e klubit anglez me UEFA-n.
PËR ÇFARË AKUZOHEN?
Në nëntor të 2018-ës, e përjavshmja gjermane "Der Spiegel" publikoi disa emaile me burim platformën "Football Leaks", që tregonin për kontrata sponsorizimi fiktive me kompaninë ajrore të Emirateve, "Etihad", për të maskuar investimet direkte të pronarit, sheikut Mansur. Në një e-mail thuhej se nga një kontratë sponsorizimi prej 67.5 milionë paundësh, mes Sitit dhe "Etihad" për sezonin 2015-16, vetëm 8 milionë paund ishin derdhur direkt nga llogaria e
kompanisë së fluturimit, sepse 59.5 milionët e tjera vinin nga Grupi "Abu Dhabi United", kompania e Mansurit, e cila administron klubin e Sitit.
KU QËNDRON PROBLEMI?
Siti ka mashtruar UEFAn, duke thyer rregullat e
"Fair Play-t Financiar" për limitin që klubet mund të shpenzojnë, duke injektuar miliona ekstra artificialisht, për shmangur kontrollin financiar. Siti këmbëngul se nuk ka bërë asgjë të gabuar dhe i ka paraprirë vendimit duke e dërguar
çështjen në KAS për ta rrëzuar. Megjithatë, kjo nuk e pengon UEFA-n që të dalë me vendimin e saj, i cili në rastin më të keq do jetë përjashtimi i klubit nga Champions-i për një sezon.
ÇFARË NDODH MË PAS?
Ky është një lajm i mirë
për të paktën një klub rival anglez. Për shkak të proceseve të gjata gjyqësore, Siti mund ta shlyej përjashtimin nga kompeticioni jo këtë sezon, por atë të pasardhës (2020-2021). Dhe nëse kjo ndodh, atëherë skuadra e radhës më poshtë në renditje në Premier Ligë i zëvendëson ata: me renditjen e sezonit aktual është Arsenali i vendit të pestë që duhet të
shkojë në Champions. Kjo do të thotë se do të hapet edhe një vend ekstra në Ligën e Europës. Megjithatë, këto janë vetëm skenarë me sikur. Në maj, vendimi i UEFA-s pritej të ishte çështje ditësh. Por tani ka kaluar një muaj më shumë dhe duke qenë se "qytetarët" e kanë dërguar edhe çështjen në KAS, kjo betejë ligjore pritet të shtyhet përtej kësaj vere.