Filo mesazh korçarëve, i hap rrugën ekipit të ri
“Skënderbeu s’u bë kurrë sh.a, po shohim zgjidhje të tjera”
Pas vendimit të KASit që la në fuqi dën imin 10-vjeçar në kompeticionet europiane dhe gjobën me 1 milion euro për Skënderbeun, për të parën herë reagon kryebashkiaku Sotiraq Filo. Numri një i bashkisë më të madhe në juglindje shfrytëzoi mbledhjen e Këshillit Bashkiak për të folur edhe për situatën në të cilën ndodhet futbolli korçar pas këtij vendimi. Ai ka sqaruar edhe pozicionin e bashkisë në klub, duke lëshuar mesazhe të qarta për një ndryshim kursi. Së pari, ai bëri me dije se vendimi për ta shndërruar Skënderbeun në shoqëri aksionere nuk u konkretizua kurrë, ndonëse këshilli i mëparshëm i bashkisë e pati miratuar si vendim. Mesazhi i dytë dhe ndoshta më i rëndësishmi ishte për alternativat e reja, duke i hapur formalisht rrugën edhe krijimit të një skuadre të re, apo “importimit” të një tjetre që do të përfaqësonte qytetin e Korçës në nivele të larta futbollistike. Kujtojmë se një vit më parë nga këshilli i vjetshëm u miratua kalimi i Skënderbeut në shoqëri aksionere, 75% të aksioneve
do t’i kalonin Ardjan Takajt, ndërsa 25% do t’i mbeteshin Bashkisë Korçë. Vendim ky që nuk u ligjërua asnjëherë në gjykatë, për arsye që ende nuk dihen.
SITUATA E AKSIONEVE - “Pavarësisht se ka pasur një vendimmarrje të Këshillit të mëparshëm Bashkiak për të qenë pjesë e këshillit të shoqërisë aksionere të Skënderbeut me 25% të aksioneve, kjo vendimmarrje nuk është zbatuar në realitet. Pra, kjo shoqëri aksionere nuk ka funksionuar, pavarësisht se është regjistruar dhe nuk është bërë aktive. Në momentin që ne flasim, klubi i futbollit Skënderbeu vazhdon të administrohet në formën e një shoqate. Ajo shoqëri aksionere nuk u bë kurrë funksionale, pavarësisht se vendime të tilla u morën në këshill. Klubi i futbollit është administruar me shoqatën e futbollit Skënderbeu. Ne dhe ju e dini se kush janë anëtarët pas ndryshimeve të bëra dhe normalisht që dihet edhe kush kanë qenë vendimmarrësit në këtë klub, duke nisur që nga presidenti e deri tek anëtarët e tjerë të kësaj shoqate”, deklaroi fillimisht Filo.
E ARDHMJA - Sotiraq Filo bën me dije se bashkia ka përgjegjësi për zhvillimet në klubin korçar. Ai saktësoi se është ende në bisedime me presidentin Ardjan Takaj në lidhje me të ardhmen e futbollit. “Situata e tanishme nuk është se na e heq përgjegjësinë neve si bashki që të interesohemi për fatin e futbollit dhe të skuadrës së Skënderbeut. Ne e dimë se si kanë rrjedhur ngjarjet në këto vitet e fundit deri në vendimin e KAS-it. Ato që dini ju, janë edhe në dijeninë e bashkisë sonë. Unë mund të them se nga informacioni që kam, duke u bazuar te bisedat e shumta që kam zhvilluar me presidentin, më është bërë me dije se çështja do të shkojë deri në fund. Takaj më ka thënë se pavarësisht vendimit të UEFA-s që u la në fuqi prej Gjykatës së Arbitrazhit Sportiv, gjithçka do të ndiqet edhe më tej. Në dijeninë time, çështja është dorëzuar për gjykim edhe në Gjykatën Federale në Zvicër. Atje ku pritet që të dalë një vendim në muajin qershor të vitit të ardhshëm. Normalisht që është një situatë delikate, pasi deri në momentin e kësaj vendimmarrjeje, dënimi i dhënë nga UEFA mbetet në fuqi. Jam duke qëndruar në kontakt me presidentin për të parë se cilat janë alternativat e tjera për të mbajtur futbollin e Korçës në nivele të larta, qofshin këto në kompeticionet kombëtare apo ndërkombëtare. Jemi duke biseduar, siç e thashë dhe shpresojmë që shumë shpejt të kemi një vendim të përbashkët në lidhje me këtë që sapo folëm”, përfundoi kryebashkiaku i Korçës, duke e lënë të hapur mundësinë se një tjetër ekip mund të ishte zgjidhja më e mirë e mundshme për të ringritur edhe një herë në majë futbollin në këtë qytet.