Probleme edhe për Xhekon, Napoli frikëson Interin
Sulmuesi këmbëngul se dëshira e tij mbetet vetëm Milano
Mes një hapi për para dhe pas për Hames Rodrigezin dhe Lozanon, sulmi i Napolit mbetet i bllokuar vetëm me Milik për momentin. Pista “Ikardi” vështirësohet me kalimin e ditëve, ashtu si “tullumbacja” Lukaku që u shfry në pak orë. Mes një zëri dhe një tjetri, vjen një lëvizje e fundit e klubit të kaltër, që mësohet se ka bërë një sondazh te Roma për të transferuar Edin Xhekon këtë verë në “San Paolo”. Vetë boshnjaku është interesuar për këtë pjesë dhe ka bërë disa telefonata informative, por asgjë më tepër. Lajmi erdhi në “Radio Kiss Kiss” Napoli, transmetuesi zyrtar i klubit, duke shpjeguar se mes emrave që klubi ka studiuar, ishte edhe ai i sulmuesit boshnjak, në skadencë kontrate verën e ardhshme me Romën. Paraqitjet e Xhekos në
fazën përgatitore i kanë shtuar dyshimet rreth një lamtumire të tij në këtë merkato. Megjithatë, preferencë e parë e sulmuesit për të lëvizur është Interi. Me zikaltrit ai thuhet se ka gjetur marrëveshjen personale prej disa javësh. Por Roma nuk heq dorë nga kërkesa e saj financiare prej 20 milionë eurosh, pavarësisht se e panë sulmuesin të rilindur në skemat e Fonsekës. Sipas “Gazzetta dello Sport”, për këtë arsye, kryeqytetasit mund të kërkojnë edhe 5 milionë euro më shumë në formë bonusesh që e komplikon situatën. Për Napolin, që është i impenjuar edhe në fronte të tjera, mbetet pak më shumë se një ide merkatoje. Por Interi nuk mund të qëndrojë kurrsesi i qetë, pavarësisht se ish-ylli i Mançester Sitit ka refuzuar ofertën e fundit të drejtorit sportiv Petraki për të rinovuar në “Olimpico”, duke përsëritur dëshirën e tij për të firmosur për Konten. Nëse asgjë nuk do të ndryshojë në ditët e ardhshme, ekziston edhe rreziku që Roma ta heqë fare nga merkatoja në fund të javës. “Corriere dello Sport” shkruan se klubi është i gatshëm
edhe ta sakrifikojë me parametër zero vitin e ardhshëm. Dhe nëse Roma i kërkon që të respektojë kontratën, 33-vjeçarit nuk i mbetet gjë tjetër veçse ta pranojë vendimin e klubit. Por a do t’i bënte Fonsekës punë një lojtar i palumtur?