Reagon Gerti Shima: Një ofendim i jashtëzakonshëm që përsëritet
Pas skandalit me Kombëtaren shqiptare të basketbollit për meshkuj, e cila nuk u lejua të stërvitej në pallatin e sportit “Feti Borova”, ka ardhur edhe reagimi i kapitenit Gerti Shima. Me anë të një postimi në rrjetin social “Facebook”, Shima shpreh indinjatën e tij në lidhje me ngjarjen e ndodhur, teksa e ka cilësuar si një ofendim të jashtëzakonshëm për vetë trajnerin dhe djemtë e ekipit mbylljen e dyerve të pallatit të sportit.
REAGIMI I KAPITENIT GERTI SHIMA
“Nuk mund të lë pa shprehur se vitet e fundit, dëshira për të qenë pjesë e ekipit kombëtar dhe për të dhënë kontributin tim (që duan apo s’duan disa persona është jashtëzakonisht i madh në barasvlershëm me kushtet e krijuara) ka qenë minimale, për të mos thënë inekzistente. Gjithsesi, nisur nga pasioni i madh dhe dashuria e pakufi për këtë sport, kam vijuar në mënyrë vullnetare dhe jo vetëm unë, por dhe shokët e ekipit, të japim kontributin tonë. Sërish ky vit ka qenë me një pikëpyetje më të madhe nëse duhet të tërhiqem apo të jem ende prezent edhe si kapiten i ekipit kombëtar, pasi personalisht e shoh konsumim fizik dhe mendor. Përveç problemit madhor që ekipi kombëtar i basketbollit shqiptar ka, çdo vit nuk përbëhet nga i njëjti grup lojtarësh dhe kjo shprehet në vështirësi të konsiderueshme për të gjithë skuadrën. Sot, sikurse fiks dhe 2 vite më përpara, përballemi me ndalimin në hyrjen e sallës sportive “Feti Borova”. E vetmja rrugë e jona — stërvitja me intensitet dy herë në ditë, për të përfaqësuar sadopak denjësisht ekipin tonë kombëtar, na mohohet në mënyre të turpshme! Pra, salla sportive ‘Feti Borova’ nuk shërben për stërvitjen normale të ekipit kombëtar të basketbollit dhe mua nuk më interesojnë arsyet, pasi faji bie me të gjithë organizatorët! Unë jam sportist dhe sot në 2019 nuk mund ta konceptoj të më ndalohet të stërvitem bashkë me shokët e skuadrës në një sallë sportive për përfaqësimin e Shqipërisë në kompeticione të ndryshme. Sigurisht, ky status është një indinjim kaq i madh dhe një ofendim i jashtëzakonshme që përsëritet për mua, trajnerin dhe gjithë djemtë e ekipit kombëtar”, shkruan Shima.