Milani sfidon sot Feronikelin, Ujkani: Historike
Kruniç titullar dhe minuta për portugezin, në "Fadil Vokrri" me fytyra të reja
Do të jetë historike miqësorja e sotme në "Fadil Vokrri" mes Feronikelit dhe Milanit. Përveç klubit kosovar dhe tifozëve nga Drenasi, kjo ndeshje mund të vuloset edhe në mendjet e disa lojtarëve kuqezinj. Raportimet nga mediat italiane bëjnë me dije se Marko Xhampaolo do të hedhë sot në fushë, në orën 20:45, disa nga blerjet e kësaj vere. Rade Kruniç do të jetë risia në mesin e fushës. Boshnjaku i ardhur për 8 milionë euro nga Empoli do të marrë vendin e Fabio Borinit. Pjesa tjetër e skuadrës me shumë gjasa do të jetë ajo e daljeve të fundit, me Suson si fantazist pas dyshes së sulmit të përbërë nga Kastijeho si partner i Piontekut. Asnjë ndryshim edhe në prapavijë, ku Romanjoli dhe Muzakio do të kenë pranë Kalabrian dhe Rodrigezin.
INFERMIERIA - Rafael Leao i është bashkuar dje ekipit nën urdhrat e trajnerit Xhampaolo. Portugezi i blerë nga Lila do të udhëtojë drejt Prishtinës (mund të aktivizohet disa minuta në krah të Piontek), ashtu si Paketa dhe mbase Leo Duarte. Braziliani nuk është gati të luajë, por mediat italiane flasin për një prani të tijën në Kosovë. Mungesa të konfirmuara, madje edhe nga Milani, ato të Frenk Kesit, Ismael Benaserit dhe Pepe Reinas. Afrikani ka vetëm tri stërvitje me ekipin, teksa kampioni i Afrikës do të zbarkojë ditën e sotme në "Milanello". Portieri spanjoll ka një dëmtim të lehtë dhe së bashku me mjekët kuqezinj është vendosur mosgrumbullimi i tij për duelin me Feronikelin.
AXHENDA - Milani do të zbarkojë sot në mesditë në
aeroportin e Prishtinës. Delegacionit kuqezi të udhëhequr nga Paolo Maldini dhe Zvonimir Boban do t'i bashkohen edhe ikona të klubit, si Daniele Masaro dhe Franko Barezi. Kuqezinjtë do të sjellin në kryeqytetin e Kosovës dhe një Kupë Kampionesh, teksa trajnerët e Feronikelit dhe Milanit do të mbajnë konferencat përkatëse për mediat. Menjëherë pas përfundimit të miqësores, kuqezinjtë do të rikthehen në Milano, teksa mësohet se dita e diel është dhënë pushim për ekipin nga trajneri Xhampaolo.